Ուսանողները հանդիպում են պահանջում վարչապետի հետ

Հայտնել էինք, որ դասադուլ հայտարարած ուսանողներն իրենց ակցիան շարունակելու են կառավարության շենքի մոտ: Այս պահին ուսանողներն արդեն կառավարության շենքի մոտ են:

Նրանց հետ հանդիպման իջավ վարչապետ Կարեն Կարապետյանի ավագ օգնական Արամ Վարդևանյանը: Նա ուսանողներին ասաց, որ տարկետման իրավունքն ընդամենը սահմանափակվում է, այլ ոչ թե ամբողջությամբ վերանում:

Ուսանողները նրան ասացին, որ ցանկանում են` վարչապետ Կարեն Կարապետյանը հանդիպի իրենց հետ ու հայտնի իր կարծիքը: «Ցանկանում ենք լսել վարչապետի կարծիքը», - ասաց «Հանուն գիտության զարգացման» նախաձեռնության անդամ Դավիթ Պետրոսյանը:

Վարդևանյանը խնդրեց, որ հստակ ձևակերպեն մտահոգությունները, սակայն ուսանողները հրաժարվեցին: Պետրոսյանն ասաց, որ բոլոր մտահոգությունները չի կարող միայն ինքը ձևակերպել, բոլորն ունեն մտահոգություններ և ցանկանում են հանդիպել վարչապետի հետ:

Վարդևանյանն էլ նշեց, որ կհաղորդի նրանց ցանկությունը վարչապետին: «Կճշտեմ, կմոտենամ»,- ասաց նա: