ՌԴ-ի, Ադրբեջանի և Իրանի նախագահները համատեղ հայտարարությունում անդրադարձել են չկարգավորված հակամարտություններին

Չկարգավորված հակամարտությունները զգալի խոչընդոտ են տարածաշրջանային համագործակցության համար: Այդ մասին ասված է Ռուսաստանի, Իրանի ու Ադրբեջանի նախագահների գագաթաժողովի արդյունքներով ընդունված համատեղ հայտարարության մեջ. հայտնում է Կրեմլի կայքը:

«Կողմերն ընդունում են, որ տարածաշրջանում չկարգավորված հակամարտությունները զգալի խոչընդոտ են տարածաշրջանային համագործակցության համար, և այդ առնչությամբ ընդգծում են միջազգային իրավունքի սկզբունքների և նորմերի ու դրանց համապատասխան ընդունված որոշումների ու փաստաթղթերի հիման վրա բանակցությունների միջոցով շուտափույթ խաղաղ կարգավորման կարևորությունը»,- ասվում է հայտարարությունում:

 Կողմերը նաև նշում են համագործակցության ընդլայնման անհրաժեշտությունը այնպիսի ոլորտներում, ինչպիսին են մշակույթը, գիտությունը, կրթությունը, սպորտը, տուրիզմը, նաև ընդգծում են երեք երկրների համագործակցության զարգացման ուղղությամբ համատեղ ջանքերի կարևորությունը: