«Քարավան 1915» ֆիլմը թուրք դերասանուհին խաղաղության ուղերձ է համարում

Թուրքիայում հայկական թեմատիկայով նկարահանված «Քարավան 1915» Ֆիլմի գլխավոր դերասանուհին Այշե Աքընը խոսել է ֆիլմի մասին, անդրադարձել կինովարձույթից այն հանելու պատճառներին. տեղեկացնում է Ermenihaber-ը:

Ըստ Աքընի` «Քարավան 1915» ֆիլմը խաղաղության ուղերձ է, և թուրքական ֆիլմը ոչ թե կաղապարելու, այլ աջակցության կարիք ունի։   Դերասանուհին պատմել է, որ ֆիլմում ինքը մարմնավորում  է հայուհու, իսկ ֆիլմը սիրո պատմությունը է իր հերոսուհու և թուրք ձիապանի միջև, որը ոչ մի կերպ չի ցանկանում հրաժարվել սիրելիից։ 

Ըստ Աքընի՝ ֆիլմի նկատմամբ վերաբերմունքի, խոչընդոտների, գրաքննության հիմնական պատճառն այն է, որ ֆիլմի յուրաքանչյուր կադրը ուղերձ է պարունակում։

Հիշեցնենք, որ ֆիլմը մեծ էկրան բարձրանալուց կարճ ժամանակ անց ռեժիսոր և սցենարիստ Իսմայիլ Գյունեշի որոշմամբ հանվել էր կինովարձույթից։ Ռեժիսորը նշել էր, որ նման որոշում է կայացվել ֆիլմի դիստրիբուցիայի հարցում առաջացած խնդիրների, կինոթատրոնների կանխակալ տրամադրվածության պատճառով:

Ռեժիսորի նկարագրություններից պարզ է դառնում, որ ֆիլմում գերակշռում է Հայոց ցեղասպանության վերաբերյալ թուրքական տեսակետը։ Ռեժիսորի կողմից Հայոց ցեղասպանությունը ներկայացվում է որպես տեղահանություն: