Թուրք դերասանուհին կանչվել է դատախազություն՝ սոցցանցերում բալի բարձր գնի մասին մեկնաբանության համար

Թուրք հայտնի դերասանուհի Բերնա Լաչինը դատախազություն է կանչվել՝ ցուցմունք տալու սոցցանցերում բալի բարձր գնի վերաբերյալ մեկնաբանությունների համար։

Իշխող «Արդարություն և զարգացում» կուսակցության (AKP) քննադատ Լաչինը երեքշաբթի Twitter-ում ասել էր, որ իրեն կրկին կանչում են դատախազություն, այս անգամ՝ ամռանը բալի բարձր գնի հետ կապված մեկնաբանությունների պատճառով:

2021 թվականի հունիսի 2-ին դերասանուհին Twitter-ում գրել էր, որ մեկ կիլոգրամ բալի գինը տատանվում է 60-ից 80 թուրքական լիրայի սահմաններում:

«Ես վաճառողներին հարցրի, թե արդյո՞ք հատապտուղների գինը ժամանակի ընթացքում կնվազի, նրանք պատասխանեցին՝ ոչ: Ի սեր Աստծո, դա բալ է: Մանուկ հասակում մենք այն դնում էինք ականջներին, ինչպես ականջօղերը: Այժմ մենք վերածվել ենք մի երկրի, որտեղ երեխաները մեծանում են՝ առանց բալի համն իմանալու: Դուք պետք է ամաչեք»,- գրել էր  թուրք դերասանուհին: