Կրակել են Սյունիքում գտնվող` Գարեգին Նժդեհի կիսանդրու վրա

Օրերս անհայտ անձինք կրակել էին Սյունիքի մարզի Խուստուփ լեռան վրա տեղադրված` Գարեգին Նժդեհի բրոնզաձույլ կիսանդրու վրա։ Այս մասին Սյունիքի մարզպետի մամուլի խոսնակ Վազգեն Սաղաթելյանը գրել է իր ֆեյսբուքյան էջում:  Նա նաև լուսանկար է հրապարակել, որում պարզ երևում է, որ արձանի գլխի հատվածում կան փամփուշտների տեղեր:

Սաղաթելյանը գրում է նաև, որ Սյունիքի մարզպետ Վահե Հակոբյանի կարգադրությամբ ստեղծվել է հատուկ հանձնաժողով, որն ուսումնասիրել է հուշակոթողի և հարակից տարածքի պահպանության վիճակը, մարզպետին ներկայացրել առաջարկություններ կիսանդրու վերականգման և հարակից տարածքի պահպանության ուղղությամբ, որից անմիջապես հետո սկսվել են վերականգնման աշխատանքները: «Այժմ Նժդեհի արձանն ունի արժանավայել տեսք։ Վանդալիզմի նման դրսևորումներից խուսափելու նպատակով մարզպետը հանձնարարել է համապատասխան մարմիններին ուժեղացվել Գարեգին Նժդեհի բրոնզաձույլ կիսանդրու և հարակից տարածքի հսկողությունը»,- գրում է Սաղաթելյանը: