Աշնանը նախատեսվում է ստորագրել Հայաստան-ԵՄ համաձայնագիրը. Շավարշ Քոչարյան

2016-ին 27,5 մլն եվրո է հատկացվել Հայաստանին Եվրամիության կողմից՝ այս կամ այն ծրագրերի իրականացման համար. ԱԺ-ում 2016-ի բյուջեի կատարողականի քննարկման ժամանակ հայտնեց ՀՀ արտաքին գործերի փոխնախարար Շավարշ Քոչարյանը։ Նա նշեց, որ շատ կարևոր էր Հայաստանի՝ «Հորիզոն 2020»-ին անդամակցելու փաստը, ինչպես նաև ԵՄ-ի հետ մի շարք ուղղություններով բանակցություններ սկսելը։

«Ծառուկյան» խմբակցության քարտուղար Վահե Էնֆիաջյանը դիմեց Քոչարյանին՝ ասելով, թե բավական երկար ժամանակ է՝ Հայաստան-ԵՄ համաձայնագիրն արտաքին ինչ-ինչ ազդակների պատճառով չի ստորագրվում։ Պատգամավորը հետաքրքրվեց, թե այս տարի աշնանը կրկին նախատեսվո՞ւմ է այդ համաձայնագրի ստորագրում, և հնարավո՞ր է, որ այն կրկին չստորագրվի։

Ի պատասխան Քոչարյանը նշեց, որ այդ փաստաթուղթն արդեն նախաստորագրվել է, և աշնանը նախատեսվում է, որ այն պետք է ստորագրվի։ «Ձեր մտավախությունները հասկանում եմ, բայց աշնանը կտեսնենք, թե ինչ ընթացք կունենա»,- ասաց նա։

Էնֆիաջյանն էլ հավելեց, թե խնդիրն այն է, որ երբ գալիս է այդ համաձայնագրի ստորագրման օրը, պարզվում է՝ այն ուղղակի չի ստորագրվելու։ «Լավ, կապրենք, կտեսնենք»,-  խոսքն ամփոփեց պատգամավորը։