Թուրքիայում ԱՄՆ դեսպանը կանչվել է ԱԳ նախարարություն՝ Էրդողանի թիկնապահների ձերբակալության գործով բացատրություն տալու

Թուրքիայում ԱՄՆ-ի դեսպան Ջոն Բասը հրավիրվել է Թուրքիայի արտաքին գործերի նախարարություն` Էրդողանի 12 թիկնապահներին  ձերբակալելու մասին  ամերիկյան կողմի որոշումից հետո:

Ըստ «Անադոլու» գործակալության՝ նախարարությունն այդ մասին հայտարարություն է տարածել՝ նշելով, որ «ամերիկյան իշխանությունները սխալ որոշում են կայացրել»:

«ԱՄՆ-ը կողմնակալ և օրենքի վրա չհիմնված որոշում է կայացրել: ԱՄՆ-ի դեսպանին տեղեկացրեցինք, որ մեր դեսպանության առջև ծեծկռտուքը տեղի ունեցավ այն պատճառով, որ տեղի անվտանգության մարմինները չձեռնարկեցին համապատասխան միջոցներ»,-նշվել է հայտարարության մեջ:

Գործի առնչությամբ տեղի ունեցած հետաքննությունը թուրքական կողմը որակել է որպես կողմնակալ և  ոչ անկախ:

Հիշեցնենք, որ մայիսի  16-ին Էրդողանի՝ ԱՄՆ այցի ընթացքում  հայ, քուրդ, ասորի և եզդի համայնքների ներկայացուցիչները ցույց էին կազմակերպել Վաշինգտոնում: Էրդողանի թիկնապահները հարձակվել էին խաղաղ ցուցարարների վրա և դաժան ծեծի ենթարկել նրանց: Միջադեպի հետևանքով վիրավորվել էր 9 ցուցարար: