Էրդողանի որդուն «վիրավորած» ընդդիմադիր ղեկավարը կանչվել է դատարան՝ բացատրություն տալու

Թուրքիայում ընդդիմադիր Ժողովրդա-հանրապետական կուսակցության ղեկավար Քեմալ Քըլըչդարօղլուն կանչվել է դատարան:

Ըստ Demokrathaber-ի՝ Քըլըչդարօղլուն, որի դեմ Էրդողանի որդուն՝ Բիլալ Էրդողանին, «հրապարակավ վիրավորելու» մեղադրանքով դատական հայց էր ներկայացվել, դատարանի որոշմամբ կանչվել է դատարան: Նրանից պահանջում են բացատրություն տալ իր հայտարարությունների համար:

«Իրականում նա պարտավոր չէ ներկայանալ, չեն էլ կարող նրան ստիպել, սակայն, քանի որ դատական գործ է հարուցվել, պետք է ներկայանա»,- Odatv-ի հետ զրույցում հայտարարել է Քըլըչդարօղլուի փաստաբանը:

Փաստաբանն ընդգծել է, որ ընդդիմության ղեկավարի խոսքերը համապատասխանում են ճշմարտությանը և վիրավորանք չեն: «Մենք ապացուցելու ենք Քըլըչդարօղլուի բոլոր ասածները»,- նշել է նա: