«Մենք հերոս ունինք, ուրեմն` պատմություն ալ ունինք»․ վկա՝ Սողոմոն Թեհլիրյանը․ հուշ-երեկո՝ Լիբանանում

Աղբյուրը՝ Aztagdaily

Կազմակերպութեամբ ՀՅԴ «Ս. Թեհլիրեան» կոմիտէին, ուրբաթ, 9 յունիս 2017-ին, երեկոյեան ժամը 8:30-ին «Յակոբ Տէր Մելքոնեան» թատերասրահին մէջ տեղի ունեցաւ յուշ-երեկոյ` նուիրուած հայ ազգի եւ Հայաստանի արդարադատ, վրիժառու բազուկ  Սողոմոն Թեհլիրեանին, որ մեր ժողովուրդին դէմ թրքական պետութեան գործադրած ցեղասպանական ահաւոր ոճիրին արդար, քաղաքական եւ ամբողջական հատուցումը պահանջելու ազգային մեր իրաւատիրութեան անմահ մարմնաւորումը հանդիսացաւ ու տակաւին կը շարունակէ եւ պիտի շարունակէ սերունդներ ամբողջ ամրապնդել ազգային պահանջատիրական ուղիէն չշեղելու ոգիով:

Հայաստանի եւ Լիբանանի քայլերգներու ունկնդրութենէն ետք Քարոզչական յանձնախումբին անունով ներկաները ողջունեց Քրիստ Քէօշկերեան, ապա ՀՅԴ «Ս. Թեհլիրեան» կոմիտէին խօսքը արտասանեց Վիգէն Քէշիշեան, որ նկատել տուաւ, թէ Սողոմոն Թեհլիրեանի անունը արժանաւոր կերպով ամրագրուած է հայ ժողովուրդի հերոսներուն կարգին: Ապա ան լուսարձակի տակ առաւ ՀՅԴ 9-րդ Ընդհանուր ժողովին տրուած որոշումով ցեղասպանները պատժելու հոլովոյթը` հաստատելով, որ այդպիսով նոր էջ բացուեցաւ հայոց ազգային-ազատագրական պայքարի պատմութեան մէջ, ամբողջ ժողովուրդի մը վրէժը լուծուեցաւ, որովհետեւ հայը թշնամիին հետ խօսեցաւ փամփուշտի լեզուով: Վ. Քէշիշեան նշեց, որ այդ փուլէն ետք հայութիւնը թօթափեց զոհի ու անիրաւուածի բարդոյթը, դարձաւ խրոխտ, մարտունակ, պահանջատէր, իրերայաջորդ սերունդներ ուխտեցին ընթանալ Թեհլիրեանի ուղիէն եւ մնալ անզիջող:

Անդրադառնալով կոմիտէութեան կրած անուան` «Սողոմոն Թեհլիրեան», Վիգէն Քէշիշեան հաստատեց, որ արդարահատոյցին շունչն ու ոգին մնայուն ներկայութիւն է ակումբին մէջ, ուր նաեւ այս տարի տեղադրուեցաւ Թեհլիրեանի կիսանդրին: Ըստ անոր, յուշ-երեկոյին նպատակն է մեծ հայը աւելի եւս ծանօթացնել ժողովուրդին, որպէսզի նոր սերունդները հաւատարիմ մնան անոր կտակին եւ ընթանան նոյն ուղիով:

Մանրամասները՝ սկզբնաղբյուրում։