ԱՄՆ-ն «ամենաբարձր մակարդակներում» բարձրացրել է Էրդողանի թիկնազորի սադրած անկարգությունների հարցը. պետդեպ

ԱՄՆ-ը մտահոգություն է հայտնել թուրքական կողմին՝ կապված Թուրքիայի նախագահ Ռեջեփ Թայիփ Էրդողանի թիկնազորի գործողությունների հետ, որոնք Վաշինգտոն կատարած այցի ժամանակ հանգեցրել էին բախումների: Այդ մասին ТАСС-ին հայտնել է պետդեպարտամենտի ներկայացուցիչը:

«Թուրքական անվտանգության ուժերի պահվածքը խոր մտահոգություն է առաջացրել: Պետդեպարտամենտն իր անհանգստությունն է հայտնել այդ իրադարձությունների կապակցությամբ ամենավերին մակարդակներում: Մանրակրկիտ հետաքննությունը, որը թույլ կտա մեզ պատասխանատվության ենթարկել մեղավորներին, մեզ համար առավել քան կարևոր է», - ասել է դիվանագետը:

Բացի այդ` պետդեպարտամենտը հաստատել է, որ չորեքշաբթի ԱՄՆ-ում Թուրքիայի դեսպան Սերդար Կիլիչը հրավիրվել է ԱՄՆ պետքարտուղարի տեղակալ Թոմաս Շենոնի մոտ: