Կանադայում Կարո Փայլանին խաչքարերի մասին գիրք են նվիրել

Թուրքիայում քրդամետ Ժողովուրդների դեմոկրատական կուսակցության հայ պատգամավոր Կարո Փայլանը հյուսիսային Ամերիկա շրջագայության շրջանակներում մայիսի 1-ին ժամանել է Մոնրեալ:

Կարո Փայլանը Հայ Դատի միջազգային խորհրդի նախագահ Հակոբ Տեր-Խաչատուրյանի և Կանադայի Հայ Դատի հանձնախմբի ներկայացուցիչ Րաֆֆի Տոնապետյանի ընկերակցությամբ այցելել է Ազգային առաջնորդարան՝ հյուրընկալվելով առաջնորդ սրբազան Բաբգեն արք. Չարյանին:

Այնուհետև նա այցելել է «Հորիզոն» խմբագրատուն՝ հանդիպելով վարիչ խմբագիր Վահագն Գարագաշյանի հետ: Վերջինս պատգամավորին է ներկայացրել թերթի 38-ամյա գործունեությունն ու խմբագրության անունից Փայլանին նվիրել Բազե Հրայրի հեղինակած «Խաչքարեր»-ի նորատիպ հատորը:

Փայլանն իր հերթին բարձր է գնահատել «Հորիզոն»-ի և Սփյուռքի հայ մամուլի առաքելությունը:

Հանդիպման ավարտին «Հորիզոն»-ը հարցազրույց է վարել Փայլանի հետ Թուրքիայի քաղաքական ներկա իրավիճակի մասին, որը կհրապարակվի առաջիկա օրերին: