Հայաստանը և Ռուսաստանը երբեք չեն եղել բարիկադների հակառակ կողմերում. Էդվարդ Նալբանդյանի հոդվածը` Независимая газета-ում

Ռուսական Независимая газета թերթում հրապարակվել է ՀՀ ԱԳՆ ղեկավար Էդվարդ Նալբանդյանի հոդվածը, որում նա անդրադարձել է հայ-ռուսական բարեկամական կապերին:

«Այսօր նշանակալի օր է. 25 տարի առաջ՝ 1992 թվականի ապրիլի 3-ին, Հայաստանի Հանրապետության և Ռուսաստանի Դաշնության միջև հաստատվել են դիվանագիտական հարաբերություններ:

Մենք, եթե կարելի է այդպես արտահայտվել, երբեք չենք եղել բարիկադների հակառակ կողմերում: Պատմության ընթացքում մեր հայրերը, պապերը բազմիցս կռվել են շատ ռազմաճակատներում»,- գրել է ՀՀ ԱԳ նախարարը` հիշեցնելով  Հայրենական մեծ պատերազմին մասնակցած հայ գեներալների, մարշալների անունները, որոնք ինչպես Ռուսաստանի, այնպես էլ Հայաստանի հպարտությունն են:

Նալբանդյանը նշել է նաև երկու երկրների հպարտությունը հանդիսացող պետական գործիչներին, գիտնականներին և արվեստի մարդկանց:

«Այսօր հայ-ռուսական դաշնակցային ռազմավարական գործընկերությունը համագործակցության օրինակելի մոդել է, որը հետխորհրդային տարածքում ամենահաջողներից և արդյունավետներից մեկն է»,- գրել է Նալբանդյանը:

Նա նշել է, որ Ռուսաստանի և Հայաստանի  միջև գոյություն ունի իրավապայմանագրային հիմք` Բարեկամության, գործընկերության և փոխօգնության մասին պայմանագիրը, Դաշնակցային փոխգործակցության մասին հռչակագիրը, ստորագրվել է ավելի քան 200 պայմանագիր ու համաձայնագիր:

Նալբանդյանի խոսքով` պահպանվում է ինտենսիվ քաղաքական երկխոսություն բարձր մակարդակով, իրականացվում է սերտ համագործակցություն անվտանգության ոլորտում, ինչպես նաև ռազմատեխնիկական համագործակցություն: 

ՀՀ ԱԳՆ ղեկավարը գրում է, որ Ռուսաստանը կարևորագույն առևտրատնտեսական գործընկեր է, հայկական արտադրանքի արտահանման շուկա: Ըստ նախարարի` զարգանում է համագործակցությունը էներգետիկայի, ատոմային էներգետիկայի, տրանսպորտի, հանքարդյունաբերության, նորարարական տեխնոլոգիաների, հումանիտար, մշակութային, գիտական, առողջապահության, տուրիզմի, կրթական ոլորտներում:

Նալբանդյանը խոսել է նաև Հայաստանում գործող ռուսական բուհերի և ռուսաց լեզվի մեծ նշանակության մասին:

ԱԳՆ ղեկավարը անդրադարձել է նաև ԼՂ հակամարտությանը` նշելով, որ Ռուսաստանը մեծ դերակատարում ունի այդ խնդրի լուծման գործում: «Մենք բարձր ենք գնահատում Ռուսաստանի միջնորդային ջանքերը ԼՂ խնդրի կարգավորման հարցում, այդ թվում՝ որպես ԵԱՀԿ Մինսկի խմբի համանախագահ»,- գրել է նա:

Նալբանդյանը հավելում է, որ թեև ադրբեջանական կողմը շարունակաբար փորձեր է կիրառում 1994-ի համաձայնագրի տապալումը իրականացնելու համար, այդ թվում՝ անցած տարվա ապրիլին ձեռնարկված լայնամասշտաբ ռազմական գործողությունները, Հայաստանը Ռուսաստանի, համանախագահ մյուս երկրների հետ համատեղ շարունակում է ջանքեր գործադրել իրավիճակի կայունացման և հակամարտության խաղաղ կարգավորման համար: