Բոլորս էլ գիտենք այս խաղի արժեքը․ Հենրիխ Մխիթարյան (տեսանյութ)

ՀՖՖ տեխնիկական կենտրոնում՝ ֆուտբոլի ակադեմիայում, տեղի ունեցավ Հայաստանի լավագույն  ֆուտբոլիստին և մարզչին պարգևների հանձման արարողությունը։ Մրցանակը ստանալուց հետո Հենրիխ Մխիթարյանը պատասխանեց լրագրողների հարցերին։

-․Ինչո՞վ է բացառիկ այս մրցանակը Ձեզ համար:

- Ճիշտն ասած՝ ոչ մի բանով բացառիկ չէր: Ուրախ եմ, որ կրկին դարձել եմ Հայաստանի լավագույն ֆուտբոլիստ: Այս մրցանակը հետագայում ինձ ավելի մեծ ուժ կտա, և կփորձեմ առավելագույնն անել, որպեսզի նորից արժանանամ այս մրցանակին:

- Որպես ազգային հավաքականի ավագ` ի՞նչ կասեք հիմա հավաքականում տիրող մթնոլորտի մասին:

- Բոլորը շատ լավ են տրամադրված, և լավ պատրաստվում ենք։ Բոլորս էլ գիտենք այս խաղի արժեքը: Կարծում եմ` կկարողանանք լավագույն կողմերով մեզ դրսևորել և խաղալ հաղթանակի համար։

- Մոնտենեգրոյի նկատմամբ տոնած հաղթանակից հետո երկրպագուների սպասելիքները մեծացել են: Դա ավելորդ ճնշում չէ՞:

- Երկրպագուների սպասելիքները միշտ  էլ մեծ են: Բոլորն էլ հաղթանակ են սպասում: Նախորդ խաղը տպավորիչ ստացվեց, և այս անգամ էլ պետք է խաղանք հաղթանակի համար:

- Ինչպիսի՞ մրցակից է Ղազախստանի հավաքականը:

- Բոլոր մրցակիցներն էլ ուժեղ են մեզ համար, երբեք հեշտ մրցակիցներ չեն լինում: Պետք է տեսնենք, թե ինչպես ենք ուսումնասիրել և որքանով ենք պատրաստ: Մրցակցի խաղը դեռ ուսումնասիրում ենք, դեռ ժամանակ կա:

Մանրամասները՝ Yerkir.am-ի տեսանյութում։