Բոլորս էլ գիտենք անթրաշ, չստիկով, սիգարետը բերանին տաքսու վարորդներին. վարչապետ

Այսօր կառավարության նիստում վարչապետ Կարեն Կարապետյանն անդրադարձավ «Զվարթնոց» օդանավակայանում ծառայություններ մատուցող տաքսիստներին: Ըստ նրա՝ մատուցվող ծառայությունները չեն համապատասխանում պահանջներին, և նրանց գործունեությունը խիստ մտահոգիչ է:

Տրանսպորտի, կապի և ՏՏ նախարար Վահան Մարտիրոսյանը հանձնարարական ստացավ մեկշաբաթյա ժամկետում «Զվարթնոց» օդանավակայանում իրականացնել պրոֆիլակտիկ աշխատանքներ` խնդիրները լուծելու համար:

«Բոլորս էլ գիտենք անթրաշ, չստիկով, սիգարետը բերանին, Երևանյան լիճը Սևանա լճի փոխարեն ցույց տվող վարորդներին: Լիցենզիա տրամադրելու ժամանակ մենք պահանջում ենք, որ վարորդի տեսքը լինի պատշաճ»,- ասաց Կարապետյանը:

Նա դիմեց ոստիկանապետ Վլադիմիր Գասպարյանին` խնդրելով կոշտ քայլեր ձեռնարկել լիցենզիա չունեցող տաքսու վարորդների հանդեպ:

«Պարո'ն Գասպարյան, ձեզանից ակնկալում ենք շատ կոշտ քայլեր: Քսան, երեսուն հազար դրամով տանում են Մալաթիա- Սեբաստիայով պտտում, բերում են Երևանյան Լիճ` որպես Սևանա լիճ ցույց տալիս»,- ասաց վարչապետը:

Ոստիկանապետ Վլադիմիր Գասպարյանը հայտնեց, որ իրենք ամենօրյա աշխատանքով փորձում են կարգավորել դաշտը: «Մենք չենք կարողանում հասնել նրան, որ կասկածելի անցյալ ունեցող, ծանր հանցագործություններով դատապարտված, նարկոդիսպանսերում հաշվառված անձինք չստանան լիցենզիա: Այդ հարցը լուրջ անհանգստություն է առաջացնում: Մենք մաքրել ենք հոգեկան խնդիրներ ունեցող անձանց լիցենզիա տալը, մենք մաքրում ենք, բայց էլի լիցենզիաներ են տրվում»,- ասաց ոստիկանապետը:

Վարչապետն արձագանքեց. «Հստակ կանոնակարգեք այդ դաշտը: Մենք չպետք է բարդացնենք բիզնես դաշտը, բայց պետք են հստակ հայտանիշներ: Ապահովեք «Զվարթնոց»-Երևան տրանսպորտ, համապատասխան գնացուցակներ դրեք, որ ամեն մեկն ինչ գին ուզենա` չդնի»: