250 միլիոն դոլարի ներդրում. Երևանում նոր էլեկտրակայան կկառուցվի

Այսօր կառավարության նիստում էներգետիկայի նախարարությունը կառավարության հաստատմանն էր ներկայացրել  Երևան քաղաքի տարածքում 250 ՄՎտ` գազային վառելիքով կոմբինացված ցիկլով էլեկտրակայան նախագծելու, զարգացնելու, ֆինանսավորելու, կառուցելու, սեփականության իրավունքով տիրապետելու, գործարկելու և պահպանելու վերաբերյալ շրջանակային համաձայնագրին հավանություն տալու մասին նախագիծը:

Կառավարությունը հայտարարել է մինչև 150 մեգավատտ հողմային և մինչև 100 մեգավատտ արևային կայաններ կառուցելու անհրաժեշտության մասին: Այլընտրանքային էներգետիկայի զարգացումը կբերի ռեակտիվ էներգիայի պակասորդի, որն այսօրվա կայանները չեն կարող ծածկել, հետևաբար` բացառիկ կարևորություն է առաջարկվող նախագիծը, քանի որ այն ուղղված է հենց այդ պակասորդի ծածկմանը:

2019-ին կավարտվի Հայաստան-Իրան երրորդ բարձրավոլտ գծի կառուցումը , նույն թվականին պլանավորվում է Հայաստան-Վրաստան նոր բարձրավոլտ գծի կառուցումը, որը կնպաստի Հայաստանից էլեկտրաէներգիայի արտահանման խթանմանը: Գործող արտադրական միավորները պատրաստ չեն մեծ ծավալով էլեկտրաէներգիայի արտահանում իրականացնել, ահա, թե ինչու նախագիծը կարևորվում է:

Նախատեսվում է 250 միլիոն դոլարի ներդրում իրականացնել: Շինարարությունը կտևի 26 ամիս, կստեղծվի 200 աշխատատեղ` բարձր աշխատավարձով: Այս նախագիծը վերջին տարիներին Հայաստանում իրականացվող ամենաարդյունավետ ներդրումն է:

Վարչապետն արձագանքեց. «Շատ մեծ հավանություն եմ տալիս այս նախագծին»: