Թուրքիայում խոչընդոտել են եվրոպական պատվիրակության հայտարարություն անելուն

Պատգամավորներից, ակադեմիկոսներից և լրագրողներից կազմված եվրոպական պատվիրակությունը հանդիպումների նպատակով այցելել է ներկայիս Թուրքիայի տարածքում գտնվող հայկական Տիգրանակերտ (Դիարբեքիր) նահանգ:

Ըստ Demokrathaber-ի՝ պատվիրակությունը հանդիպումներ է ունեցել ՀԿ-ների, միությունների և քաղաքական կուսակցությունների հետ՝ տեղեկանալով այնտեղ տեղի ունեցող իրադարձությունների մասին:

Քրդամետ «Դեմոկրատական շրջաններ» կուսակցության հետ հանդիպման ընթացքում ոստիկանները շենքի դիմաց հերթապահություն են իրականացրել և, նահանգապետարանի հրամանով խոչընդոտել եվրոպական պատվիրակության հայտարարություն անելուն:

Պատվիրակությունը, այնուամենայնիվ, հայտարարությունն արել է կուսակցության շենքից: Պատվիրակության անունից հայտարարություն արած՝ Քեմբրիջ համալսարանի պրոֆեսոր Թոմաս Միլեյը հայտարարել է, որ իրականացրել են նախօրոք ծրագրած իրենց հանդիպումները, և ցանկություն է հայտնել հանդիպել Թուրքիայի Իմրալը կղզում ձերբակալված՝ Քուրդիստանի բանվորական կուսակցության առաջնորդ Աբդուլլահ Օջալանի հետ: Նա տեղեկացրել է, որ այդ հարցով դիմել են Թուրքիայի արդարադատության նախարարություն, սակայն, առանց որևէ բացատրության, մերժում ստացել:

Միլեյը նշել է, որ իրենք քաջ գիտակցում են, որ այդ շրջանում փողոց դուրս գալու արգելքի հետևանքով մարդու իրավունքների ոտնահարման դեպքեր կան: Նա հայտարարել է նաև, որ այցից հետո պատվիրակությունը կազմելու է զեկույց և այն ներկայացնելու է միջազգային կառույցներին: