Ղրղզստանի քաղաքացին հերքում է իր մասնակցությունը ահաբեկչությանը

Ղրղզստանի քաղաքացի Յահիե Մաշրապովը, որին կասկածում են Ստամբուլում տեղի ունեցած ահաբեկչությանը մասնակից լինելու մեջ, Turmush պարբերականին հայտնել է, որ որևէ կապ չունի հարձակման հետ: Նրա խոսքով` ինքը Ստամբուլ է ժամանել հունվարի 1-ին` արդեն այն բանից հետո, երբ հարձակումը տեղի էր ունեցել: Մաշրապովն ընդգծել է, որ չգիտի, թե ինչպես է համացանցում հայտնվել իր անձնագրի լոսւանկարը:

Ղրղզստանի քաղաքացու անձնագրի լուսանկարը հունվարի 3-ին լայնորեն տարածվել է համացանցում, այնուհետև հայտնվել թուրքական TRT World հեռուստաալիքի եթերում: Պնդում էին, թե հենց այդ տղամարդն է կասկածվում ահաբեկչության մեջ, թեև պաշտոնապես այդ տեղեկատվությունը չէր հաստատվել:

Փաստորեն, հանցագործը դեռևս ազատության մեջ է: Նրան որոնում են:

Հիշեցնենք, որ հունվարի 1-ին Ստամբուլի գիշերային ակումբներից մեկն էր ներխուժել Սանտա Կլաուսի դիմակով ահաբեկիչը ու կրակ բացել այցելուների ուղղությամբ: Զոհվել էր 39 մարդ: Ահաբեկչության պատասխանատվությունը ստանձնել է ԻՊ-ը: