900-ից ավելի գինեկոլոգներ կանցնեն թեստավորում և ատեստավորում

Մոր և մանկան մահացությունների յուրաքանչյուր դեպքին հաջորդում են մեր քայլերը, որոնց մասին միշտ չէ, որ բարձրաձայնում ենք: Այսօր` 2016-ի ամփոփիչ ասուլիսի ժամանակ, ասաց ՀՀ առողջապահության նախարար Լևոն Ալթունյանը:

Ըստ նրա` առողջապահության նախարարության գլխավոր գինեկոլոգ Ռազմիկ Աբրահամյանին հրահանգվել է 2017-ի առաջին իսկ 6 ամսվա ընթացքում ունենալ զրույցներ, անցկացնել ատեստավորումներ երկրում գործող բոլոր մանկաբարձ-գինեկոլոգների հետ:

«900-ից ավելի գինեկոլոգներ կանցնեն թեստավորում, հարցազրույց, որից հետո Աբրահամյանն իր անձնական երաշխիքը կտա նրանց աշխատանքի համար: Ցավոք, այսօր նախարարությունը չունի լծակներ` կանխելու գործունեությունն այն մասնագետների, ովքեր չեն անցնի թեստավորումը: Սակայն  հիմա փոփոխությունների փաթեթ է մշակվում, որպեսզի նախարարությունը հնարավորություն ունենա ոչ պատշաճ բժշկական ծառայություն մատուցող բժիշկների գործունեության լիցենզիան կասեցնելու»,-ասաց Ալթունյանը:

Ի դեպ, առողջապահության նախարարության` 2016-ի բյուջեն կազմել է 89 միլիարդ դրամ, և օպտիմալացման արդյունքում նախարարությունը որոշակի խնայողություններ է արել, ինչի շնորհիվ գալիք տարի ավելի շատ ծառայություններ կմատուցի մեր քաղաքացիներին: