ԲՀԿ-ի նախընտրական սխեման Ծառուկյանն է գլխավորելու

ԱԺ ճեպազրույցների ընթացքում ԲՀԿ-ական պատգամավոր Միքայել Մելքումյանն անդրադարձավ Գագիկ Ծառուկյանի՝ քաղաքականություն վերադառնալուն: Նա նախ հիշեցրեց, որ դեռևս սեպտեմբեր ամսին ինքը հայտարարել է, որ Գագիկ Ծառուկյանը ժամանակավոր է հեռացել, և այդ խնդիրը պետք է դիտարկել ժամանակի և տարածության մեջ:

ԲՀԿ-ականի խոսքով՝ Ծառուկյանի վերադարձը քաղաքական կյանքի և քաղաքական գործընթացների համար անհրաժեշտություն է, նրա տեղը լրացված չէ, և դաշտում որոշակի փոշիացում է տեսնում: Մելքումյանն ընդգծեց, որ Գագիկ Ծառուկյանը ԲՀԿ-ի շարքային անդամ չէ, կուսակցության հիմնադիրն է ու առաջնորդը, բայց վերադարձի մասին կոնկրետ հայտարարություն անելու իրավունքը միայն Ծառուկյանինն է:

«Այո, Գագիկ Ծառուկյանն է գլխավորելու ընդհանուր այն սխեման, որով մենք առաջ ենք շարժվելու»,- ասաց պատգամավորը՝ հավելելով, որ նախընտրական ցուցակը կգլխավորի Ծառուկյանը, թե` ոչ, այդ մասին կհայտարարի հենց ինքը՝ Ծառուկյանը:

«Սխեման սա է, բայց ինչ կոնկրետ դեմքերով ու ձևաչափերով, դրա մասին կհայտարարվի»,- հավելեց նա:

Մելքումյանը խոսեց նաև ԲՀԿ-ի քաղաքական ուղղվածության մասին և ասաց, որ եթե կուսակցությունը իշխանական չէ, ուրեմն ընդդիմադիր է: «Մենք իշխանություն չենք, ընտրություններից հետո կերևա՝ ինչ ձևով հանդես կգանք: Հիմա «եթե»-ներով չխոսենք»,- ասաց նա: