Մելիքյանը չի հերքում՝ ասել է «տականք»

ՀՀԿ խմբակցության քարտուղար Գագիկ Մելիքյանն այսօր խորհրդարանում լրագրողների հետ զրույցում փորձեց պարզաբանել իր աղմկահարույց հայտարարությունը ՝ կապված 1000 դրամների հետ:

Նա նախ հայտարարեց, թե իրեն վերագրվող արտահայտությունները չի ընդունում, քանի որ նման բան չի ասել, սակայն, երբ նրան հիշեցրեցինք, որ Yerkir.am-ի հետ զրույցում է այդ արտահայտությունն արել և ձայնագրության մեջ էլ հստակ լսվում է նրա կողմից արտաբերված «տականք» բառը, որն ուղղված էր ֆեյսբուքյան գրառում արած առնվազն հիսուն օգտատիրոջ, Մելիքյանն արդարացավ՝  այո, ասել է, բայց դա ուղղված չէր հանրությանը կամ ժողովրդին:

«Հիմա ես ասում եմ հետևյալը` «Ֆեյսբուք»-ում, իրոք, նման նախագծի հետ կապված ապազգային նմանատիպ հայտարարություններ եղել են, հակապետական, հակահայկական, Արցախի անվտանգությանը դեմ նման արտահայտություններ, իրոք, եղել են: Իմ արտահայտությունը վերաբերել է «Ֆեյսբուք»-ում նմանատիպ արտահայտություններ անողներին, իմ արտահայտությունը երբևէ ժողովրդին ու հանրությանը չի վերաբերել»,- ասաց պատգամավորը:

Նշենք, որ Yerkir.am-ի նյութը վերնագրված էր հետևյալ կերպ. «Պետք չէ մի քանի տականքների անունից գրված գրառումներին պատասխանել. ՀՀԿ-ական պատգամավոր»: Սա Գագիկ Մելիքյանի ուղիղ խոսքն է:

Մեր այն հարցին՝ ֆեյսբուքյան այդ օգտատերերը հանրության մաս չե՞ն, Մելիքյանը պատասխանեց. «Մաս են կազմում, բայց հանրություն չեն»:

Նա շարունակում էր պնդել, որ այդ բառը վերաբերում էր ֆեյսբուքյան գրառումներ անողներին: «Եթե հանրության մեջ նման ընկալում է ձևավորվել, ես պատրաստ եմ ներողություն խնդրել, սակայն իմ խոսքը ժողովրդին չի վերաբերում»,- ասաց պատգամավորը:

Ի դեպ, նա նշեց նաև, որ նյութի բովանդակության հետ կապված որևէ նկատառում չունի և համաձայն է, որ իր խոսքը հստակ, բառացի գրված է նյութում:

Մելիքյանը, պատասխանելով Yerkir.am-ի հարցին՝ միգուցե նախագիծը ճիշտ չներկայացվե՞ց, նշեց. «Միգուցե իսկապես գաղափարը չի ընկալվել, սա մեր թերությունն է, բացթողումն է, որ չենք կարողացել ավելի հստակ, ավելի լավ ներկայացնել գաղափարը: Ես համոզված եմ, որ ճիշտ ընկալման դեպքում բոլորի մոտ միայն կլինի դրական ցանկություն»: