Անահիտ Բախշյանը հրավիրվել է ԿԳ նախարարություն

Երեկ Երևանի ավագանու «Բարև Երևան» խմբակցության անդամ Անահիտ Բախշյանը բաց նամակ էր հղել  ՀՀ վարչապետին: Տիկին Բախշյանը նշում էր, որ 2009-ին  ընդունված՝ «Հանրակրթության մասին»  ՀՀ օրենքով, ուսումնական հաստատության ղեկավարման իրավունք՝   հավաստագիր կոչվող փաստաթղթով, որը տրվում է 5 տարով, և նորը ստանալու համար   տնօրենի թեկնածուից  օրենքը պահանջում է վերապատրաստվել ու հանձնել նոր քննություն:

«Ստիպված եմ հրապարակային նամակով դիմել Ձեզ՝ հայտնելով, որ ԿԳ նախարար պարոն Լևոն Մկրտչյանի 18.05.2010թ. N 395-Ն հրամանը  հակասում է «Հանրակրթության մասին» ՀՀ օրենքի 12-րդ հոդվածով սահմանված՝ ուսումնական հաստատության տնօրենի հավաստագրման եւ ընտրության ընթացակարգին: Ըստ օրենքի՝ ուսումնական հաստատության տնօրենի թափուր տեղի համար հայտարարվում է մրցույթ, որին մասնակցելու իրավունք է ստանում այն անձը, ով վերջին 10 տարվա մեջ  ունի 7 տարվա մանկավարժական ստաժ, անցել է վերապատրաստում համապատասխան լիցենզավորված կազմակերպության կողմից, այնուհետեւ քննություն՝ գրավոր եւ բանավոր փուլերով և ստանում է ուսումնական հաստատության ղեկավարման իրավունք՝ հավաստագիր: Հստակ գրված է, որ ղեկավարման իրավունքի հավաստագիրը տրվում է 5 տարի ժամկետով:
Նույն օրենքի 15-րդ կետն ասում է. «Ուսումնական հաստատության ղեկավարման իրավունքի հավաստագիր ստացած անձը կարող է մինչեւ հավաստագրի ժամկետի լրանալը դիմել եւ անցնել սույն հոդվածի 3-րդ մասով սահմանված վերապատրաստումը եւ ստանալ ուսումնական հաստատության ղեկավարման ՆՈՐ հավաստագիր»:

Օրենքի  12-րդ հոդվածի 15-րդ կետում շեշտված «հավաստագրի ժամկետ» ու «նոր հավաստագիր» նորմերի   անհրաժեշտությունն ամրագրված է Հանրակրթական ուսումնական հաստատության ղեկավարման  իրավունքի (հավաստագրման)  համար քննության կազմակերպման և անցկացման կարգի 82-րդ  և  83-րդ կետերով, որտեղ  սահմանված է ՀԱՎԱՍՏԱԳՐԻ ՇՆՈՐՀՄԱՆ ԿԱՐԳԸ՝  «Վերապատրաստված, քննությանը մասնակցած և Հավաստագրման հանձնաժողովի որոշումով «Ուսումնական հաստատության ղեկավարման իրավունքի (հավաստագրի)»  շնորհման ենթակա    հավակնորդին շնորհվում է «Ուսումնական հաստատության ղեկավարման իրավունքի հավաստագիր»՝  5 տարի ժամկետով, որը  նա ստանում է քննության արդյունքները ամփոփելուց հետո 10-օրյա ժամկետում»: Միանշանակ է՝ միայն  վերապատրաստված, ՔՆՆՈՒԹՅԱՆԸ մասնակցած  հավակնորդը կարող է ստանալ  ՀԱՎԱՍՏԱԳԻՐ, այն էլ  քննությունների արդյունքները  ամփոփելուց  10 օր  հետո:

Ըստ նախարարի  18.05.2010թ. N 395-Ն  հրամանի՝ մեկ անգամ ուսումնական հաստատության ղեկավարման իրավունք ստացած անձինք վերապատրաստումից հետո այլեւս քննություն չեն հանձնելու և  այս անօրինական հրամանն արդեն մտել է ուժի մեջ:

Պարոն Վարչապետ, Ձեզ եմ դիմում, որպեսզի  կառավարությունը կասեցնի  ԿԳ նախարարի  անօրինական հրամանի գործունեությունը»,-գրում է տիկին Բախշյանը:

Yerkir.am-ի հետ զրույցում ՀՀ ԿԳ նախարարի մամուլի խոսնակ Լուսինե Մարգարյանը նշեց, որ կրթության ոլորտի խնդիրների մասին հրապարակային արտահայտվելու տիկին Բախշյանի սովորույթը նոր չէ, այն  պարբերական բնույթ է կրում: Մասնավորապես, ըստ Մարգարյանի, ՀՀ  վարչապետին ուղղված  «Բաց նամակում» Բախշյանն անդրադարձել է ուսումնական հաստատությունների տնօրենների հավակնորդների հավաստագրման վերաբերյալ ՀՀ կրթության և գիտության նախարարի հրամանին՝ նշելով, թե իբր հրամանը հակասում է օրենքին:

«Հարկ ենք համարում տեղեկացնել, որ այն սահմանված կարգով անցել է փորձաքննություն և ստացել պետական գրանցում: «Հանրակրթության մասին» ՀՀ օրենքի 12-րդ հոդվածը սահմանում է  դրույթներ «վերապատրաստում», «հավաստագրում»  գործընթացների վերաբերյալ, մասնավորապես` նույն հոդվածի 15-րդ մասը սահմանում է, որ  «ուսումնական հաստատության ղեկավարման իրավունքի հավաստագիր ստացած անձը կարող է մինչև հավաստագրի ժամկետի լրանալը դիմել և անցնել սույն հոդվածի 3-րդ մասով սահմանված վերապատրաստումը և ստանալ ուսումնական հաստատության ղեկավարման իրավունքի նոր հավաստագիր»:  Նոր կարգավորումներով չեն փոփոխվել տնօրենի թափուր տեղի համար հավակնորդին ներկայացվող պահանջները, մրցույթի ընթացակարգը, դրանք չեն ենթադրում տնօրենի թափուր տեղի համալրում առանց մրցույթի կամ լիազորված մարմինի կողմից տնօրենների պաշտոնավարման ժամկետի երկարացում»,-ասում է Մարգարյանը:

Նա նշեց նաև, որ Անահիտ Բախշյանը  ՀՀ կրթության և գիտության նախարարության Կրթության ազգային ինստիտուտի փոխտնօրենն է և  որպես կրթության ոլորտի խնդիրներով «մտահոգ»  մարդ`  կարող էր  մինչև հրապարակային ելույթ ունենալը`   իր մտահոգությունները ներկայացնել  նախարարություն և ստանար պարզաբանումներ.«Ամեն դեպքում տիկին Բախշյանը հրավիրվել է նախարարություն` պատասխանատուների հետ նամակում բարձրաձայնած հարցերը քննարկելու համար»:

Նշենք նաև մի հանգամանք`  տիկին Բախշյանը նամակում նշել է ՀՀ կրթության և գիտության նախարար Լևոն Մկրտչյանի 18.05.2010թ. N395-Ն հրամանի մասին, որի ընդունման ժամանակ ՀՀ կրթության և գիտության նախարարը Լևոն Մկրտչյանը չէր: