Այլևս բացառվում է թվերի նկարչություն. նախարար

Համար առաջին նպատակը իրատեսական բյուջե ներկայացնելն էր. խորհրդարանում լրագրողներին ասաց ֆինանսների նախարար Վարդան Արամյանը: Ըստ նրա` բյուջեն պետք է ներկայացվի տնտեսական զարգացումներին համահունչ:

«Այլևս բացառվում է թվերի նկարչություն: Ես չեմ կարող ասել, թե եղել է երբևէ թվերի նկարչություն, չեմ կարող այդպիսի գնահատական տալ: Մեր հիմնական նպատակը իրատեսական, իրագործելի և մեր ռեսուրսներին համահունչ բյուջե ներկայացնելն է»,- ասաց նախարարը:

Անդրադառնալով առաջին նախագահ Լևոն Տեր-Պետրոսյանի այն հայտարարությանը, թե Հայաստանում դեֆոլտի վտանգ կա, նախարարը նշեց, որ վերջին երկու տարում պարտքի աճը պայմնավորված է արտաքին աշխարհից ներթափանցող շոկերով:

«Դա չի նշանակում՝ կա դեֆոլտի մեծ հավանականություն: Դեֆոլտը ոչ այլ ինչ է, եթե ոչ քո ֆինանսական պարտավորությունների կամ սեփականատերերի նկատմամբ ստանձնած պարտքի պարտավորությունների չկատարում: Մենք այդպիսի խնդիր հիմա չունենք: Բյուջեն ծախսերի մասով կատարվում է այնպես, ինչպես ծրագրավորված է»,- ասաց նախարարը: