Պուտինի հետ քննարկեցինք Հալեպում տիրող իրավիճակը. Էրդողան

Համաշխարհային էներգետիկ կոնգրեսի 23-րդ նստաշրջանի շրջանակներում Թուրքիայում գտնվող Վլադիմիր Պուտինը երկրի նախագահ Էրդողանի հետ քննարկել է Հալեպում տիրող իրավիճակը:

Ըստ թուրքական իշխանամետ AA-ի՝ Էրդողանի ու Պուտինի՝ 1 ժամ 40 րոպե տևած հանդիպումից հետո համատեղ ասուլիս է տեղի ունեցել:

Թուրքիայի նախագահը նշել է, որ, բացի երկկողմ համագործակցության նոր հնարավորություններից, քննարկել են նաև Սիրիայում միասին գործելու հետ կապված հարցեր:

Էրդողանի խոսքով՝ Պուտինի հետ քննարկել են, թե «Եփրատի վահան» գործողության  շրջանակում ինչպես կարող են երկու համագործակցել:

«Իհարկե, սա շատ նուրբ հարց է: Քննարկեցինք տարածաշրջանի և հատկապես` Սիրիայի մասին մի շարք հարցեր: Հալեպի հարցի շուրջ զրուցել ենք այն մասին, թե հումանիտար ի՞նչ օգնություն կարող ենք ցուցաբերել, ի՞նչ ռազմավարություն կարող ենք կիրառել, որպեսզի Հալեպի ժողովուրդը վայրկյան առաջ խաղաղություն տեսնի»,- ասել է Թուրքիայի նախագահը:  

Էրդողանը նաև հույս է հայտնել, որ ՌԴ-ի հետ հարաբերությունների բարելավման գործընթացն ավելի արագ կընթանա: