Աստված տա, Վանաձորում քաղաքական ուժերի միջև համաձայնությունը երկար տևի. Վահրամ Բաղդասարյան

Այսօր խորհրդարանական ճեպազրույցներում ՀՀԿ խմբակցության ղեկավար Վահրամ Բաղդասարյանն անդրադարձավ կառավարության վարչապետի և անդամների փոփոխությանը` ասելով, որ այդ փոփոխությունները հետևանք էին այն բանի, որ նախորդ կառավարությունը դանդաղ էր գործում` տեմպի առումով:

Բաղդասարյանի խոսքով՝ անձերի փոփոխությունները շատ ժամանակավոր արդյունք են տալիս, իրականում անհրաժեշտ է մոտեցումների փոփոխություն: Ըստ նրա` Հովիկ Աբրահամյանի ծրագիրն էլ վատը չէր, պարզապես այն պետք է փուլերի բաժանվեր:

Ինչ վերաբերում է ՏԻՄ ընտրություններին, մասնավորապես` արդյո՞ք ՀՀԿ-ն չի վախենում, որ Վանաձորում իշխանությունը կարող է անցնել ընդդիմության ձեռքը, Վահրամ Բաղդասարյանն ասաց. «Քաղաքականության մեջ մտնողների վախը պորտի հետ կտրել-գցել են մի կողմ: Քաղաքականության մեջ պետք չէ վախ ունենալ: Ես ողջունել եմ, որ ընդդիմադիր քաղաքական ուժերը կարողանում են գալ կոնսենսուսի: Վանաձորի դեպքում ընդդիմության համաձայնությունը ես համարում եմ լավ քայլ, քանի որ այսքան տարիներ ընդդիմադիր ուժերի միջև համագործակցության մասով ոչինչ չէր ստացվում, իսկ եթե ստացվում էր, կարճ կյանք էր ունենում: Աստված տա, այս համաձայնությունը երկար տևի, որովհետև դրանով հիմք կդրվի քաղաքական դաշտի կայացմանը»:

Բաղդասարյանը չի համարում, որ ՀՀԿ-ն պարտություն է կրել Վանաձորում, որովհետև շատ լավ արդյունքներ են գրանցել, բայց եթե ընդդիմադիր ուժերը միավորվում են և հաղթում, հաղթանակը դարձյալ ՀՀԿ-ինը կլինի: «Հայ ժողովուրդը միշտ նախապատվությունը տալիս է մեկ ուժի, այլ ոչ` հավաքական ուժի: Նույնիսկ սպորտում է այդպես, երբ թիմայինը հաջողություններ չի գրանցում»,- ասաց նա: