Օրենսդիր մարմինը գնալով օտարվել, մեկուսացել է օրենսդրական գործունեությունից

Այսօր «ԱԺ մոնիտորինգ» ծրագիրը լրագրողներին ներկայացրեց  5-րդ գումարման խորհրդարանի 9-րդ նստաշրջանի գործունեության և պատգամավորների գույքի ու եկամուտների 2012-2016թթ. հայտարարագրերի դիտարկման արդյունքները:

«ԱԺ մոնիտորինգ» ծրագրի ղեկավար Լուսինե Վասիլյանը նշեց, որ խորհրդարանը 112 օրենք է ընդունել 9-րդ նստաշրջանի ընթացքում, որի երկու երրորդը ընդունվել է արտահերթ նստաշրջանների ժամանակ: Ի դեպ, ամենակարևոր օրենսդրական ակտերը նույնպես ընդունվել են արտահերթ նիստերի ընթացքում: Խորհրդարանի նախաձեռնողականության մակարդակն ավելի է վատացել` 95 տոկոս կառավարություն և 5 տոկոս ԱԺ հարաբերակցությամբ:

«Մենք սա անվանել ենք խորհրդարանի օտարում, մեկուսացում օրենսդրական գործունեությունից»,- ասաց Լուսինե Վլասյանը:

Շարունակելով դիտարկումները` նա նշեց, որ ԱԺ 12 մշտական հանձնաժողովներից 5-ը որևէ լսում չի իրականացրել` խախտելով ԱԺ կանոնակարգ-օրենքի պարտադիր պահանջը: Եղել են հանձնաժողովներ, որոնք ընդհանրապես նիստ չեն  հրավիրել, օրինակ` եվրոպական ինտեգրման հանձնաժողովը: