Երեք բան, որ նախաձեռնել է մշակույթի նոր նախարարը

Այսօր մշակույթի նոր նախարար Արմեն Ամիրյանին լրագրողները հարցրեցին մշակութային արժեքները ոչնչացնելու դեմ պայքարի մասին: «Մենք հիմա փորձում ենք եղած մշակութային արժեքների մասով ծրագիր կազմել: Այնպես չէ, որ նախարարությունը 100 տոկոսանոց վերահսկողություն ունի` այդ բոլոր կառույցների պահպանման առումով, գումարները շատ քիչ են, բայց  պետք է մշակել մեխանիզմներ, ենթակառուցվածքներ, որ շատ ճիշտ և նպատակակետին տարված աշխատանք իրականացվի պատմամշակութային հուշարձանները պահպանելու ուղղությամբ, որ դրանք դառնան զբոսաշրջության և պարծանքի առարկա»,- ասաց նախարարը:

Հարցին, թե արդյո՞ք դա նշանակում է, որ մշակույթի նախարարությունը պատրաստվում է սերտ համագործակցել զբոսաշրջության ոլորտի հետ, Ամիրյանը պատասխանեց, որ մշակույթը այն կարևորագույն ոլորտն է, որը պետք է խթանի զբոսաշրջությունը, մանավանդ, որ այդ առումով Հայաստանը ցուցադրելու շատ բան ունի` ունենալով ամենահին մշակույթներից մեկը:

Ինչ վերաբերում է գրախանութները ընտանեկան ժամանցի կենտրոն դարձնելու` նախարարի նախաձեռնությանը, նա նշեց, որ դա պետք է դիտարկել գրահրատակչական ցիկլի մեջ: «Գրախանութները պետք է դառնան ընտանեկան ժամանցի վայր, այնպես, ինչպես կինոթատրոններն են: Դա լուրջ խթան պետք է հանդիսանա գրահրատարակչական գործի համար»,- ասաց Ամիրյանը:

Առաջին երեք ոլորտները, որտեղ պետք է փոփոխություններ արվեն, ըստ նախարարի, հետևյալն են` գրահրատարակչություն, կինոարտադրություն,  հուշարձանների պահպանությամբ` զբոսաշրջության խթանում: