Դասալքության մեջ մեղադրվող կապիտանին կվերադարձնեն Հայաստան

Ռուսաստանի Տոբոլսկ քաղաքում ձերբակալել են Հայաստանի զինված ուժերի զինծառայողի, ով ՀՀ իրավապահների կողմից հետախուզվում էր դասալքության համար: Այդ մասին հայտնում են ռուսական լրատվամիջոցները՝ վկայակոչելով Տյումենի շրջանային դատախազությանը: Դատախազության տվյալներով՝ Հայաստանի 28-ամյա քաղաքացին 7 տարի ծառայել է ՀՀ զինված ուժերում, սակայն այս տարվա փետրվարին արձակուրդ է վերցրել և հեռացել Հայաստանից:

Yerkir.am-ի հետ զրույցում ՀՀ քննչական կոմիտեի նախագահի խորհրդական Սոնա Տռուզյանը հաստատեց հիշյալ անձի` հետախուզման մեջ գտնվելու փաստը և հայտնեց, որ ներկայումս ՀՀ քննչական կոմիտեում քրեական գործ է քննվում` ՀՀ ՔՕ 362-րդ հոդվածի 1-ին մասի (դասալքության) հատկանիշներով:

Ըստ քննության տվյալների՝ կապիտանը, գտնվելով հիմնական արձակուդում, 2016-ի փետրվարին մեկնել է Հայաստանից և չի վերադարձել ծառայության: Քրեական գործով որոշում է կայացվել նրան որպես մեղադրյալ ներգրավելու մասին և նրա նկատմամբ հայտարարվել է հետախուզում: Վարույթն իրականացնող մարմինը տեղեկացվել է, որ մեղադրյալը օգոստոսի 26-ին ձերբակալվել է ՌԴ իրավապահների կողմից: Ներկայումս իրավասու մարմինները միջոցներ են ձեռնարկում նրան Հայաստանին հանձնելու ուղղությամբ:

Նշենք, որ ՀՀ զինված ուժերում հատուկ թույլտվություն է պետք արձակուրդի ընթացքում երկրից բացակայելու համար: