Ո՞վ է տեսել` հաղթող կողմը տարածք տա, ուղղակի անհեթեթություն. Շաքարյանցը` լավրովյան փաթեթի մասին

ԼՂ հիմնահարցի վերաբերյալ հիմա առաջարկությունների ինչ-որ փաթեթ է պտտվում, որն, ասում են, Լավրովի առաջարկությունների ցանկն է, բայց անկախ փորձագետ Սերգեյ Շաքարյանցն այն անհեթեթ բան է համարում: Այսօր նա լրագրողներին ասաց, որ այդ փաթեթում առաջին դրույթն ԱՄՆ-ի ցանկությունն է` Հայաստանի` հողեր հանձնելը: «Սա ուղղակի չգիտեմ ինչ է, և ինձ համար ոչ համոզիչ մի բան: Ո՞վ է տեսել` հաղթող կողմը տարածք տա, ուղղակի անհեթեթություն»,- ասաց փորձագետը:

Ինչ վերաբերում է վերջին օրերին անցկացված` Պուտին-Ալիև, Պուտին-Սարգսյան հանդիպումներին, ապա, ըստ Շաքարյանցի, Բաքու գնալուց առաջ Պուտինը հստակ մի բան էր ասել` ոչ մեկից ոչ մի պայման չի պահանջի: Ռուսաստանը, ըստ փորձագետի, Իրանի հետ համատեղ փորձում է ամեն կերպ ձգձգել Ղարաբաղյան հիմնահարցի վերջնական լուծման պահը: «Այս հանդիպումները փաստում էին այն մասին, որ պատերազմ առաջիկայում չի լինի: Ադրբեջանը, սակայն, 1996-ից ի վեր փորձում է ճնշում գործադրել մեզ վրա, ինչը նորից կշարունակվի»,- ասաց Շաքարյանցը: