Կյանքից հեռացել է Իվ Բոնֆուան

93 տարեկան հասակում կյանքից հեռացել է ֆրանսիացի ժամանակակից գրող Իվ Բոնֆուան: Այս մասին տեղեկանում ենք BBC-ից:

Բոնֆուայի գրքերը թարգմանվել են ավելի քան 30 լեզուներով: Բոնֆուայի «Ժամը ներկա» բանաստեղծական ժողովածուն թարգմանվել է նաև հայերեն`  Շուշանիկ Թամրազյանի թարգմանությամբ:

Իր առաջին բանաստեղծական ժողովածուն գրողը հրապարակել է 1946-ին: Բոնֆուան գրքեր է գրել նաև արվեստի պատմության մասին, ինչպես նաև ակնարկներ՝ այնպիսի հայտնի նկարիչների աշխատանքների վերաբերյալ, ինչպիսիք են Պիկասոն, Ալբերտո Ջակոմետին…

Բոնֆուան նաև մեր ժամանակի մեծագույն թարգմանիչներից է. Շեքսպիրի ողբերգությունները, Պետրարկայի սոնետները, Լեոպարդիի, Քիթսի և Յաթսի պոեզիան` բանաստեղծի թարգմանությամբ, նորանոր գիտական ուսումնասիրությունների առարկա են դառնում աշխարհի տարբեր համալսարաններում: Նա նաև ֆրանսերեն է թարգմանել իր ընկերոջ՝ հույն բանաստեղծ Յորգոս Սեֆերիսի ստեղծագործությունները: