Դա մեկ մարդու որոշելիքը չէ. ՀՀԿ-ականը` ՀՕՊ-ի համաձայնագիրն ԱԺ արտահերթ նիստի օրակարգում ներառելու մասին

Երեկ կառավարությունը հունիսի 27-ին հրավիրված ԱԺ արտահերթ նստաշրջանի օրակարգում է ընդգրկել նաև Հայաստանի և Ռուսաստանի միջև միավորված հակաօդային պաշտպանության համակարգ ստեղծելու համաձայնագիրը: Պայմանագիրն ԱԺ գլխադասային՝ արտաքին հարցերի հանձնաժողովի նիստում քննարկվել է դեռեւս հունիսի 3-ին, սակայն հունիսի 6-ին սկսված հերթական քառօրյայում  և 13-17-ը տեղի ունեցած ԱԺ արտահերթ նստաշրջաններում այն չքննարկվեց:

«Հայաստանի Հանրապետության և Ռուսաստանի Դաշնության միջև Հավաքական անվտանգության կովկասյան տարածաշրջանում հակաօդային պաշտպանության միավորված տարածաշրջանային համակարգ ստեղծելու մասին» համաձայնագիրը ստորագրվել է 2015 թվականի դեկտեմբերի 23-ին Մոսկվայում:

ՀՀԿ-ական պատգամավոր Համլետ Հարությունյանը կառավարության վերոնշյալ որոշման մեջ որևէ արտառոց բան չի տեսնում և ԱԺ-ի արտահերթ նիստում ՀՕՊ-ի համաձայնագիրն ընդգրկելը պայմանավորում է նրանով, որ իշխանություններն են այդպես նպատակահարմար գտել, և դա անհատի որոշելիք չէ: Պատգամավորը Yerkir.am-ի հետ զրույցում նշեց, որ զարմացած է հասարակության շրջանում առկա այն մտավավախությունից, թե  ինչ-որ բան այն չէ ուրեմն, որ  ՀՕՊ համաձայնագրին միանալու հարցը ԱԺ արտաահերթ օրակարգ է բերվել:

«Միջպետական համաձայնագիր է, որը շատ կարևոր է: Ես կողմ եմ դրան, քանի որ տեսնում եմ դրա կարևորությունը: Շատ կարևոր համաձայնագիր է, և եթե իշխանությունները հիմա են հարմար գտել այն բերել ԱԺ օրակարգ, նշանակում է, որ դա է հարմար պահը: Այդ որոշումը մեկ մարդու, անհատի որոշելիքը չէ, իշխանություններն են որոշում»,- ասաց Հարությունյանը` արձագանքելով մեր այն դիտարկմանը, թե ՀՀԿ խմբակցության ղեկավար Վահրամ Բաղդասարյանը  նախորդ արտահերթի ընթացքում լրագրողների հետ զրույցում ասել էր. «Մենք շտապելու տեղ չունենք»: