Իրավիճակը ցույց տվեց, որ Մադրիդյան սկզբունքները կիրառելի չեն. Միքայել Մելքումյան

Այսօր խորհրդարանական ճեպազրույցների ժամանակ ԲՀԿ խմբակցության պատգամավոր Միքայել Մելքումյանը անդրադարձավ ԱԺ ՀՅԴ խմբակցության քարտուղար Աղվան Վարդանյանի այն առաջարկին, որ քաղաքական ուժերը  ջենտլմենական փաստաթուղթ ստորագրեն ընտրախախտումներից զերծ մնալու մասին:

ԲՀԿ-ականի խոսքով՝ ցանկացած տիպի պայմանավորվածության` լինի ջենտլմենական, թե` այլ տեսակի, ԲՀԿ-ն կողմ է, եթե այն հանգեցնում է ընտրական գործընթացի մթնոլորտի փոփոխության: Պատգամավորը դեմ է ընտրակաշառքին, հովանավորչությանը, վարչական ռեսուրսի օգտագործմանը:

«Ես անձամբ կողմ եմ ցանկացած համաձայնագրի, որը միտված է ընտրախախտումների վերացմանը»,- ասաց Միքայել Մելքումյանը:

Ինչ վերաբերում է ղարաբաղա-ադրբեջանական շփման գծի երկայնքով շարունակվող ռազմական գործողություններին, ԲՀԿ-ականը կարծիք հայտնեց, որ մերթ ընդ մերթ շարունակվող ռազմական գործողությունները խոսում են այն մասին, որ բանակցությունների արդյունավետության մասին խոսք լինել չի կարող։

«Մինչև չդադարեն պատերազմական գործողությունները՝ պայմաններ և նախադրյալներ չեն կարող լինել բանակցությունների մասով: Իրավիճակը ցույց տվեց, որ Մադրիդյան սկզբունքները կիրառելի չեն: Իսկ համանախագահների ինստիտուտը պետք է որոշակի երաշխիքներ տա, եթե չկա, ապա բանակցություն ասելը վիրտուալ բան կարող է լինել»,- ասաց նա: