Իրան-Հայաստան տնտեսական համագործակցության մեջ շատ բան կախված է Հայաստանի դիվանագիտական ջանքերից. տնտեսագետ

Երեկ նախագահի նստավայրում մեկնարկել էր արտերկրում և միջազգային կազմակերպություններում ՀՀ դեսպանների հետ խորհրդակցությունների շարք: Քննարկվել են ՀՀ տնտեսական շահերն առաջ մղելու նոր հնարավորությունները, դեսպանընկալ պետությունների հետ տնտեսական կապերի՝ նոր նախագծերի, ներդրումների և առևտրաշրջանառության ավելացման հնարավորությունները, ինչպես նաև կրթության, առողջապահության և մշակույթի ոլորտներում համագործակցության զարգացման հեռանկարները: Նախագահի խորհրդակցությունը նվիրված է եղել Իրանի Իսլամական Հանրապետության հետ Հայաստանի Հանրապետության հարաբերությունների օրակարգային հարցերին, ընթացիկ ծրագրերին, նոր նախաձեռնություններին, ինչպես նաև կոնկրետ աշխատանքների վերաբերյալ հանձնարարականների կատարման ընթացքին: Խորհրդակցության ժամանակ Սերժ Սարգսյանը նաև ասել է, որ մոտ ժամանակներս ՀՀ արտաքին գործերի նախարարությունում կունենանք նախարարի տեղակալ, ով հատուկ զբաղվելու է արտաքին տնտեսական խնդիրներով: 

Yerkir.am-ի հետ զրույցում, պատասխանելով հարցին, թե ի՞նչ հեռանկարներ կարող են ունենալ նախագահի այս խորհրդակցությունն ու տված հանձնարարականները, տնտեսագետ Վարդան Բոստանջյանն ասաց, որ ինքն էլ շատ կարևորում է նախագահի մոտեցումը, որովհետև Իրանի պես երկիրը` իր հզորությամբ և նոր  հնարավորություններով, Հայաստանի նկատմամբ ունեցած դրական վերաբերմունքով, Հայաստանին հնարավորություններ է ընձեռում համագործակցությունը զարգացնելու:

Ըստ Բոստանջյանի` այդ առումով նախագահի դիրքորոշումն ակնհայտորեն տեղին, ժամանակին ու ճիշտ էր, քանի որ կարևոր է ԱԳՆ-ում մասնագետ ունենալ, ով կկոորդինացնի ծավալուն համագործակցությունը Իրանի հետ:

Տնտեսագետի կարծիքով` առաջիկայում Հայաստանի դիվանագիտական ջանքերից կախված կլինի` կկարողանա՞ Հայաստանն օգտվել Իրանի հետ տնտեսական համագործակցության հեռանկարներից, թե՞ ոչ: նա հույս ունի, որ Հայաստանը կկարողանա հաջողել դիվանագիտական ջանքերում:

«Իրանն արդեն բարձրաձայնել է ինչպես գազամատակարարման, այնպես էլ ճանապարհային հաղորդակցության, էներգետիկ համակարգերում համագործակցության մասին: Դա շատ կարևոր է»,- ասաց Վարդան Բոստանջյանը:

Նրա խոսքով՝ Իրան-Հայաստան երկաթուղու հարցը տեխնիկայի ու ֆինանսների հարց է, և կողմերը համամասնորեն կփորձեն լուծել ֆինանսի հարցը, այսինքն` ճկուն դիվանագիտության պարագայում Հայաստանի վրա կարող է ընկնել այնքան ֆինանսական ծանրաբեռնվածություն, որքան նա կարող է տանել:

«Իրանը դիվերսիֆիկացված երկիր է և Հայաստանին համարում է հուսալի գործընկեր: Սերժ Սարգսյանի շեշտադրումները այդ խորհրդակցության ժամանակ չափազանց կարևոր էին Հայաստանի համար` զարգացման նոր պատուհան բացելու տեսանկյունից»,- ասաց տնտեսագետը: