Չեմ կարծում`Ռուսաստանը հրճվանքի մեջ է` Իրան-Հայաստան համագործակցության առումով. Վարդան Բոստանջյան

Իրանի նկատմամբ պատժամիջոցների կասեցումը Հայաստանի համար դրական երևույթ է. լրագրողներին ասաց տնտեսագետ Վարդան Բոստանջյանը` անդրադարձավ Իրանի նկատմամբ պատժամիջոցների չեղարկմանը և այդ համատեքստում Իրանի և Հայաստանի համագործակցության արդյունավետությանը: 

«Դարեր շարունակ Իրանը լուրջ, ինքնաբավ, հավասարակշռված երկիր է եղել: Բնականաբար, պատմական անցքերում չկա այնպիսի բան, որ Իրանը Հայաստանին վնասներ պատճառած լինի: Իր քաղաքականությամբ Իրանը հեռանկարային է: Պետք է նայենք` ՀՀ-ն ի՞նչ մոտեցումներ հանդես կբերի` հետագա համագործակցության առումով»,- ասաց նա:

Բոստանջյանը նշեց նաև, որ Իրանը, լինելով մեր անմիջական հարևանը, կարող է տրանսպորտային խնդիրների լուծման էլ բերել:

«Իրանը մեզ համար անհատակ շուկա է, այդ երկիրը վառելիքաէներգետիկ հսկայական ռեսուսների է տիրապետում: Հայաստանը կողքից կարող է օգտվել մեծ տիրույթի զարգացումներից: Բազմաթիվ երկրներ բացահայտ կամ ոչ բացահայտ ցանկություն ունեն համագործակցելու Իրանի հետ: Իրանի հնարավորությունները մեծ են և այդ երկիրը կայուն է»,- ընդգծեց տնտեսագետը` հավելելով. «Մենք գտնվում ենք ռուսական ազդեցության տիրույթում, և չեմ կարծում, որ Ռուսաստանը հրճվանքի մեջ է` Իրան- Հայաստան համագործակցության առումով: Ռուսատանը լուռ կհամաձայնի, եթե այդ համագործակցության արդյունքում Հայաստանը չհզորանա»: