Վարդան Ղուկասյանը ևս բացատրություն է տվել. Շիրակի դատախազ

Շիրակի մարզի դատախազ Րաֆֆի Ասլանյանը Yerkir.am-ի հետ զրույցում տեղեկացրեց, որ Գյումրիի նախկին քաղաքապետ Վարդան Ղուկասյանի և նրա որդու  հետ կապված դեպքի շրջանակներում բացատրություն է վերցվել մի շարք անձանցից, նշանակվել է դատաբժշկական փորձաքննություն:

«Նյութերի նախապատրաստման արդյունքները հրապարակման  ենթակա չեն, մարզի դատախազը իրավասու չէ հրապարակել բովանդակությունը»,- ասաց նա` հավելելով, որ լրատվամիջոցներում արծարծվող` մարդկանց մասին բոլոր հանգամանքները քննության առարկա են, և բոլոր այդ անձանցից ստացվում են բացատրություններ, նշանակվում են դատաբժշկական փորձաքննություններ: «Սա իրավական մասն է: Ասեմ նաև, որ մարզի դատախազն իրեն թույլ չի տա խորանալ և ինչ-որ մարդկանց PR մենեջերը լինել»,- ասաց Ասլանյանը:

Մեր այն հարցին, թե Վարդան Ղուկասյանը և՞ս կանչվել է հարցաքննության, նա պատասխանեց. «Բոլորը բացատրություններ են տվել, իհարկե` նաև Վարդան Ղուկասյանը: Չի կարող լինել անձ, ով բացատրութուն չտա»:

Հիշեցնենք, որ Գյումրիի նախկին քաղաքապետ Վարդան Ղուկասյանը Yerkir.am-ի հետ զրույցում արդեն երկրորդ անգամ հերքեց իր ընտանիքի հետ կատարվող միջադեպի մասին տեղեկությունները` նշելով նաև, որ ոստիկանությունն էլ հաղորդագրություն է տարածել լրատվական կայքերում տեղ գտած ինֆորմացիայի հիման վրա: