Հրայր Թովմասյանը կոչ է անում քաղաքական ուժերին` չբոյկոտել ընտրական նոր օրենսգրքի քննարկումները

Այսօր լրագրողները ԱԺ աշխատակազմի ղեկավար Հրայր Թովմասյանից հետաքրքրվեցին ընտրական նոր օրենսգրքի մասին: Նա նախ նշեց, որ ընտրական նոր օրենսգիրքը հարկավոր է Հայաստանի քաղաքացիներին: Ինչ վերաբերում է էլեկտրոնային քվեարկության հետ կապված խնդիրներին, Հրայր Թովմասյանն ասաց, որ բոլորն են խոսում դրա մասին, բայց ոչ ոք չգիտի, թե դա ինչ է:

«Այն երկրներում, որտեղ չկա վստահություն ընտրական համակարգերի նկատմամբ, խորհուրդ չի տրվում էլեկտրոնային համակարգի ներդրումը: Բայց էլեկտրոնային համակարգը կոչված է ապահովելու վստահության բարձրացումը: Հիմա այս խնդրի լուծումը պետք է տեսնել հետևյալ համատեքստում` այդ համակարգերը պետք է մշակված լինեն միջազգային բարձր հեղինակություն ու վստահություն ունեցող կազմակերպությունների կողմից, դրանք պետք է անցնեն միջազգային աուդիտ»,- ասաց նա բացատրելով, որ էլեկտրոնային քվեարկության բաղկացուցիչ մաս են կազմում ընտրողների գրանցումը, բուն քվեարկությունը և, այսպես կոչված, «խելացի քվեատուփերը», որոնք ավտոմատ հաշվում են, թե ում օգտին է կատարվել քվեարկությունը:

Ընտրական նոր օրենսգրքի ընդունման վերջնաժամկետը հունիսի 1-ն է, և Հրայր Թովմասյանը հորդորեց բոլոր քաղաքական ուժերին` մասնակցել ընտրական նոր օրենսգրքի վերաբերյալ քննարկումներին, չբոյկոտել, որովհետև եթե հենց սկզբից որևէ քաղաքական ուժ չի մասնակցում այդ քննարկումներին, դա կարող է չծառայել նպատակին ու չնպաստել  ընտրական համակարգի նկատմամբ հանրության վստահության բարձրացմանը: