13 տարի առաջ ՀՀ-ում սպանություն կատարած տղամարդուն հայտնաբերել և Իսպանիայից տեղափոխել են Հայաստան

2003 թ. հունվարի 7-ին, ժամը 18.30-ի սահմաններում, Երևանի Կողբացու փողոցի թիվ 53 շենքի դիմաց «Կալաշնիկով» ինքնաձիգից կրակոց արձակվեց: Կրակողի նպատակը «Վազ-21213» մակնիշի ավտոմեքենայի վարորդ Արթուր Մկրչյանին սպանելն էր:
Դեպքի հաջորդ օրը վերջինս, ստացած հրազենային վնասվածքից, հիվանդանոցում մահանում է:
Ձեռնարկված միջոցառումներով ոստիկանները պարզեցին կրակողի ինքնությունը՝ 1982 թ. ծնված Արմեն Ավետիսյան:
Նրան հայտնաբերել և քրեական պատասխանատվության ներկայացնել չհաջողվեց: 
Ավետիսյանի նկատմամբ հայտարարվեց միջազգային հետախուզում և օպերատիվ-հետախուզական ու որոնողական լայնածավալ միջոցառումները շարունակվեցին:
ՀՀ ոստիկանության կազմակերպված հանցավորության դեմ պայքարի, քրեական հետախուզության գլխավոր վարչություններ, Հայաստանի և Իսպանիայի Թագավորության ինտերպոլի ազգային կենտրոնական բյուրոների համագործակցությունը տվեց ցանկալի արդյունքը: 2015 թ. ապրիլի 21-ին Արմեն Ավետիսյանը Իսպանիայում հայտնաբերվեց և կանավորվեց, իսկ 2016 թ. հունվարի 22-ին ՀՀ ոստիկանության օպերատիվ խմբի կողմից Մադրիդ-Մոսկվա-Երևան չվերթի ինքնաթիռով տեղափոխվեց Հայաստան և փոխանցվեց ոստիկանության Շենգավիթի բաժնի ծառայողներին: