Էրդողանի՝ «լաց ու ծիծաղ» առաջացնող հայտարարությունները՝ 2015 թվականին

Ռուսական Սու-24 ինքնաթիռի խոցման և Պուտինի հետ հարաբերությունների վերաբերյալ

Իմ՝ ազնիվ պետական գործիչ լինելու մասին Պուտինը շատ հայտարարություններ է արել:

Ի՞նչ գործ ունի ՌԴ-ն Սիրիայում:

Զանգեցի Պուտինին, չպատասխանեց:

Թուրքական արտադրանք գնես-չգնես՝ մեզ համար մեկ է:

Եթե նույն խախտումն այսօր լինի, Թուրքիան դարձյալ նույն կերպ կվարվի:

3 ժամ անց

Եթե մենք իմանայինք, որ ինքնաթիռը ռուսական է, գուցե մեր զգուշացումն այլ կերպ անեինք:

G20-ի գագաթաժողովում նեկտարին ուտելիս

Կներեք` կծելով եմ ուտելու:

Խորհրդարանական առաջին ընտրություններում կրած պարտությունից հետո

Մեր ժողովրդի գնահատականն ամեն ինչից վեր է:

Իր նախաձեռնությամբ երկրորդ անգամ անցկացված խորհրդարանական արտահերթ ընտրություններից հետո

Ժողովրդի կամքը պետք է հարգել:

Հայոց ցեղասպանության 100-րդ տարելիցի, այդ կապակցությամբ  ՌԴ նախագահ Վլադիմիր Պուտինի՝  Հայաստան այցի և հայերի մասին

Պուտինին ասացի, որ նեղսրտել եմ: Ասացի, որ մեր հարաբերություններին վնաս է հասցրել, և որ պետք է նորից աչքի տակով անցկացնենք դրանք:

Մենք բարդույթներ չունենք, պատրաստ ենք նաև բացել մեր ռազմական արխիվները, թաքցնելու ոչինչ չկա:

Առաջին անգամը չէ, որ Ռուսաստանը կիրառում է «ցեղասպանություն» բառն այդ հարցում: Ես անձամբ տխրեցի, որ Պուտինը նման քայլ արեց:

Էրդողանի կողմից հայերին հասցեագրված ուղերձն ընթերցվել էր Կ.Պոլսի Սուրբ Մարիամ եկեղեցում Հայոց ցեղասպանության զոհերի հիշատակին մատուցված պատարագի ժամանակ:

Հայերի համար հատուկ նշանակություն ունեցող այս օրը հարգանքով հիշում ենք Առաջին համաշխարհային պատերազմի տարիներին Օսմանյան կայսրության օրոք զոհվածներին և ցավակցում նրանց երեխաներին ու թոռներին: Մենք գնահատանքով ենք հիշում Օսմանյան կայսրությունում և Թուրքիայի Հանրապետությունում տնտեսական, սոցիալական, մշակութային, քաղաքական ներդրում ունեցած հայերին, ինչպես նաև մեր աշխարհագրության ամեն մի անկյունում թողած` նրանց գեղեցիկ ժառանգությունը:

***

Իմ հարգարժա’ն հայ քաղաքացիներ, մեկ անգամ ևս կրկնում եմ, որ տեղյակ ենք հայ ժողովրդի` նախկինում ապրած ցավալի իրադարձությունների մասին և անկեղծորեն կիսում ենք ձեր ցավը: Մենք ուզում ենք, որ դուք իմանաք` օսմանյան հայերի աշխարհասփյուռ թոռների համար մեր սրտերի դռները միշտ բաց են:

***

Ապրիլի 24-ին Հայաստանում հավաքվելու են, իրենք նվագեն, իրենք երգեն: Խոսելու են և վիրավորանքներ են հնչեցնելու Թուրքիայի հասցեին: Մենք էլ նույն օրը հավաքվելու ենք Չանաքքալեում, սակայն մեր օրակարգում Հայաստանը չկա: 

***

ԵՄ-ն ոչ միայն մեզանից հետ է, այլև` շատ ավելի հեռու: Վերջին հայտարարության մեջ ասում են` արխիվները պետք է բացվեն: Ես 12 տարի է՝ ասում եմ, որ դրանք պատրաստ ենք բացել ամեն պահի: Կա\'մ սրանք ականջ ունեն, չեն լսում, կա\'մ էլ ուրիշ բաներով են զբաղված: Մենք պատրաստ ենք բացել այդ արխիվները: Եթե Հայաստանն էլ  արխիվ ունի,  թող նա էլ բացի:

***

Թուրքիան ոչ մի երկրի նկատմամբ թշնամանք չունի, այդ թվում՝ իր հարևանների:

***

Հայերը, լրագրողներն ու միասեռականները սադրիչներ են:

***

«Մամուլի ազատություն» արտահայտությունը շատ դեպքերում օգտագործվել է որպես այս երկիրը ծնող, պահող ազգային և հոգևոր արժեքները ստորացնելու միջոց: Այս երկրի ԶԼՄ-ները հեղաշրջումների ժամանակաշրջաններում իրենց ցուցաբերած վերաբերմունքով ամոթալի անցյալ ունեն:

***

Թող նախագահի նստավայրում ոսկե զուգարանակոնք գտնեն, և ես հրաժարական կտամ:

Պատրաստեց՝ Արազ Գայմագամեանը