Փոստանջյանը «բացահայտում է», թե որ դեպքում հետ կքաշվեն իշխանությունները

Այսօր խորհրդարանական ճեպազրույցների ժամանակ «Ժառանգություն» խմբակցության ղեկավար Զարուհի Փոստանջյանը խոսեց «խաղաղ անհնազանդությունների» մասին: Նա մի քանի անգամ այս քառօրյայի ընթացքում կոչ էր արել հասարակությանը` դիմել խաղաղ անհնազանդության բոլոր մեթոդներին:

Ըստ Զարուհի Փոստանջյանի` կառավարությունը հայտարարեց, որ հնարավորությունների բյուջե է, այսինքն` գումարները չեն բավականացնելու իշխանությանը:

«Ես հենց այնպես կոչ չարեցի` դիմել անհնազանդության, մենք չպետք է սնուցենք այս իշխանությանը, դրա համար էլ կոչ արեցի, որ քաղաքացիները չվճարեն արագաչափերի ներկայացրած վճարները տուգանքները, դիմեն գործադուլների: Դա է լինելու խաղաղ անհնազանդությունը: Եթե այս գործողությունները համակարգված լինեն, ապա իշխանությունը հետ կքաշվի: Տեսեք, թե ինչպես Վենեսուելայում հաղթեց ընդդիմությունը, անգամ` այն դեպքում, երբ այդ ընդդիմության լիդերները բանտերում էին»,- ասաց նա:

Զարուհի Փոստանջյանը համոզված է` եթե իշխանություններին սնուցելու աղբյուրները չլինեն, եթե Երևան, Գյումրի, Վանաձոր, Կապան քաղաքներում միաժամանակ ու համակարգված անհնազանդություններ լինեն, ոստիկանությունը հնարավորություն չի ունենալու արձագանքել ու ճնշել դրանք: