Իմ որդին օրը ցերեկով չի կրակել. Արթուր Նալբանդյան

Սահմանադրական բարեփոխումների հետ կապված՝ ամեն ինչ բնականոն հունով է ընթանում.ն այսօր խորհրդարանում ասաց Լոռու մարզպետ Արթուր Նալբանդյանը:

Նա նշեց, որ քարոզչությունն իրականացնում է աշխատանքային ժամից հետո: «Եթե դուք չեք վստահում, կարող եք լինել մարզում և տեսնել: Արդյունքները պարզ կլինեն դեկտեմբերի 7-ից հետո»,- նշեց մարզպետը:

Խոսելով մարզի բնակչության նախնական տրամադրվածության մասին` Նալբանդյանն ասաց, թե այս պահի դրությամբ մարդիկ պասիվ են, բայց ճիշտ և գրագետ քարոզարշավի դեպքում անպայման  կակտիվանան:

Մեկնաբանելով այն հանգամանքը, որ, ի թիվս այլ բարձրաստիճան պաշտոնյաների զավակների, վերջերս իր որդին էլ էր հայտնվել աղմկահարույց միջադեպի կենտրոնում, Նալբանդյանը նշեց, թե դա զուտ պատահականություն է եղել: «Ես կխնդրեմ՝ իմ որդու հետ կապված մի դեպք էլ նշեք, եթե գիտեք: Պատահականություն ցանկացած մարդու հետ կարող է լինել: Այդ պատահականությունը կարող էր լինել նաև ձեզ հետ: Իմ որդին օրը ցերեկով չի կրակել»,- ընդգծեց մարզպետը: