Սահմանադրական բարեփոխումներով ընդդիմադիր կուսակցություններին լայն լիազորություններ են տրվում. Լևոն Մարտիրոսյան

ՀՀԿ խմբակցության պատգամավոր Լևոն Մարտիրոսյանն այսօր լրագրողների հետ հանդիպման ընթացքում անդրադարձավ Ռուսաստանի հայերի միության նախագահ Արա Աբրահամյանի` հայկական քաղաքական դաշտ մուտք գործելու հավանականությանը:

«Արա Աբրահամյանը ժամանակ է խնդրել, որ միանա քաղաքական կուսակցություններին կամ էլ իր կուսակցությունը ստեղծի: Ես էլ կհարգեմ նրա այդ ցանկությունը»,- ասաց պատգամավորը:

Անդրադառնալով սահմանադրական հանրաքվեին և նոր Սահմանադրության նախագծին` Մարտիրոսյանը նշեց, որ սահմանադրական փոփոխությունների փաթեթը ենթադրում է ավելի մեծ կայացվածություն և ժողովրդավարություն:

«Սահմանադրական բարեփոխումներով ընդդիմադիր կուսակցություններին լայն լիազորություններ են տրվում: Ախր, մեր ընդդիմադիր քաղաքական ուժերն են պահանջել այդ փոփոխությունները: Հարյուր տոկոսանոց համամասնականին անցումը նրանց պահանջներից մեկն է: Վերջին տարիների ընթացքում  այդ պահանջը հնչել է երևի մի հազար անգամ: Հարյուր տոկոսանոց համամասնականի դեպքում ավելի դժվար է վերարտադրվել: Սա իշխանության համար հետընթաց է»,- ասաց պատգամավորը:

Ըստ նրա` միայն քաղաքական էլիտայի խնդիրն է սահմանադրական բարեփոխումների մասին խոսելը: «Ես կարծում եմ` նորմալ է, որ քաղաքական էլիտայի որոշ ներկայացուցիչներ դեմ են սահմանադրական բարեփոխումներին: Դա նորմալ է և լավ է»,- ընդգծեց Մարտիրոսյանը: