Ով որտեղ է լողում. «քանի ԱԺ-ում իրար ձեռ ենք առնում, մի երկու անեկդոտ էլ պատմենք»

Այսօր ԱԺ քառօրյա նիստում, ուր քննարկվում էր ԿԲ դրամավարկային ծրագրի տարեկան հաշվետվությունը, ԱԺ ընդդիմադիր պատգամավոր, նախկին վարչապետ Հրանտ Բագրատյանը հարց ուղղեց հիմնական զեկուցող` ԿԲ նախագահի տեղակալ Ներսես Երիցյանին: «Ինչո՞ւ չեք իջեցնում գնաճը և ասում եք՝ լողացող քաղաքականություն ենք վարում: Մի հատ խնդրում եմ` ճշտեք՝ ով որտեղ է լողում»,- ասաց Բագրատյանը` շարադրելով մի շարք հարցեր:

Ներսես Երիցյանը փորձեց հերթով պատասխանել բոլոր հարցերին, ինչ վերաբերում է լողալու մասին հարցին, ասաց. «Թե ով որտեղ է լողում, հարցը մի քիչ լիրիկական էր, ես չեմ կարող ասել: Ամբողջությամբ լողացող փոխարժեք որևէ երկիր երկարաժամկետում, կարող եմ ասել, չունի»:

Հրանտ Բագրատյանը խիստ դժգոհ էր Ներսես Երիցյանի պատասխաններից: Պատգամավորի կարծիքով՝ իր բոլոր հարցերը գրեթե անպատասխան մնացին:

«Ախր ի՞նչ արձագանքեմ: Դա նման է այն իրավիճակին, որ` «դե, քանի ձեռ ենք առնում իրար, եկեք ձեզ երկու անեկդոտ պատմեմ»: Ի՞նչ արձագանքեմ, ԿԲ նախագահն էլ այստեղ չէ, ես բան չունեմ ասելու, եղբա\'յր»,- դժգոհեց նա:

Ներսես Երիցյանը փորձեց շտկել իրավիճակը` ասելով, որ ինքը շատ լուրջ է վերաբերվում թե\' Հրանտ Բագրատյանին, թե\' նրա բարձրացրած հարցերին և լուրջ էլ պատասխանում է: