Աշխարհում ստեղծված իրավիճակն այլեւս անտանելի է. Պուտինը` ՄԱԿ-ի ամբիոնից

«Մենք բոլորս տարբեր ենք եւ դրան պետք է վերաբերվել հարգանքով: Ոչ ոք պարտավոր չէ  հարմարվել  զարգացման մեկ մոդելի, որ ինչ-որ մեկի կողմից ճանաչվել է միակ ճիշտը»,- ՄԱԿ-ի ամբիոնից ելույթ ունենալով հայտարարեց ՌԴ նախագահ Վլադիմիր Պուտինը:

ՌԴ նախագահն իր ելույթում անդրադարձել է մի շարք հարցերի: Խոսելով սիրիական հիմնախնդրի մասին` Պուտինն ասել է, որ միջազգային հանրության մեծագույն սխալը սիրիական իշխանությունների հետ չհամագործակցելն է, քանի որ այդ իշխանություններն իսկապես պայքարում են ահաբեկչության դեմ, որի  ազդեցության ընդլայնումը  ծայրահեղ վտանգավոր է դարձել: Պուտինը  առաջարկել է  ստեղծել հակաահաբեկչական  կոալիցիա, որի հիմքում կլինեն մահմեդական երկրները: «Աշխարհում ստեղծված իրավիճակն այլեւս  անտանելի է»,- հայտարարել է Պուտինը` ընդգծելով. «ԻՊ-ը պատահական չի ստեղծվել, այն ստեղծել են, որպես անպետք ռեժիմների դեմ գործիք: Այսօր իրավիճակը ողջ աշխարհում խիստ վտանգավոր է, դուք գոնե հասկանում եք, թե ինչ արեցիք»: 

Պուտինը խոսել է նաեւ ուկրաինական ճգնաժամից` ընդգծելով, որ հեղափոխությունն այդ երկրում հրահրված էր դրսից: «Նախեւառաջ առաջարկվեց ՆԱՏՕ-ի ընդլայնում:  Հարց է առաջանում` ինչու: Այնուհետեւ ետխորհրդային երկրներին կանգնեցրին ընտրության առջեւ` լինել Արեւմուտքի, թե Արեւելքի հետ: Վաղ թե ուշ նման առճակատումը  պետքէ վերածվեր լուրջ աշխարհաքաղաքական ճգնաժամի, ինչն էլ տեղի ունեցավ Ուկրաինայում` հետո վերածվելով քաղաքացիական պատերազմի»,- ասել է Պուտինը: 

Ի դեպ, ՌԴ նախագահի ելույթից առաջ դահլիճը ցուցադրաբար լքել է Ուկրաինայի պատվիրակությունը: