Որ քաղաքական ուժերը կմասնակցեն Վենետիկի հանձնաժողովի անդամների հետ հանդիպմանը

Արդեն տեղեկացրել ենք, որ Վենետիկի հանձնաժողովի անդամները վաղը`օգոստոսի 25-ին, խորհրդարանական և արտախորհրդարանական ուժերի հետ հանդիպում են ունենալու`  Սահմանադրության նախագիծը քննարկելու, իրենց առաջարկները ներկայացնելու համար:

Yerkir.am–ը կապ հաստատեց մի քանի քաղաքական ուժերի հետ` տեղեկանալու` մասնակցելո՞ւ են Վենետիկի հանձնաժողովի ներկայացուցիչների հետ հանդիպումներին:

ՀԱԿ պատգամավոր  Արամ Մանուկյանն ասաց, որ դեռևս հայտնի չէ` իրենք մասնակցելո՞ւ են հանդիպմանը, թե՞ ոչ:  «Դեռևս քննարկում ենք այդ հարցը, բայց սահմանադրական «չարեփոխումների» բովանդակային քննարկումներին չենք մասնակցում»,- ասաց նա:

ՕԵԿ պատգամավոր Հովհաննես Մարգարյանը հայտնեց, որ իրենք մասնակցելու են հանդիպմանը: «Դեռ չգիտեմ, թե կոնկրետ ովքեր են մասնակցելու, բայց ՕԵԿ-ն անպայման ունենալու է իր մասնակցությունը:  Մեր տեսակետը վաղուց է հայտնի, և մեր ներկայացրած առաջարկների վերաբերյալ իրենց դիրքորոշումը հայտնել են նաև հենց այդ նույն հանձնաժողովի ներկայացուցիչները»,- ասաց պատգամավորը:

«Ժառանգություն» խմբակցության պատգամավոր, ՀՀՇ ներկայացուցիչ Ալեքսանդր Արզումանյանը նշեց, որ «Ժառանգություն» խմբակցությունը, ամենայն հավանականությամբ, կմասնակցի քննարկումներին, իսկ ՀՀՇ-ի մասով որևէ բան ասել չի կարող:

Նշենք նաև, որ հանդիպմանը մասնակցելու են ՀՅԴ-ն, ՀՀԿ-ն, ԲՀԿ-ն: