Մելիտինեի ՀՅԴ կոմիտեի քարտուղարն իր ծննդավայրն ուղարկվելու պատրվակով ձերբակալվել է և սպանվել

Ծնվել է 1885 թ., Խարբերդի նահանգի Մելիտինեի (Մալաթիա) գավառի կենտրոն Մելիտինե քաղաքում:

Ծնողները՝ Ղազար և Գոհար Անսուրյանները վաղաժամ են մահացել և որբուկը մեծացել է Հովսեփ հորեղբոր խնամքի տակ: 1895 թ. հայկական կոտորածների ժամանակ զոհվել է նաև հորեղբայրը և փոքրիկը մնացել է կատարյալ որբ:  

Նախնական կրթությունն ստացել է ծննդավայրի Սբ Երրորդություն վարժարանում:

1903 թ. ուղարկվել է Կարին և անվճար ուսանել Սանասարյան վարժարանում:

1906 թ. ավարտելով ուսումը, վերադարձել է Մելիտինե և ուսուցչություն արել Մայր վարժարանում, դասավանդելով քիմիա, բուսաբանություն, թվաբանություն, տոմարակալություն և բնագիտություն:

Միաժամանակ, եղել է Մելիտինեի ՀՅԴ կոմիտեի քարտուղարը: Ուսուցչություն անելու ընթացքում կապուչին միաբան հայր Սելեսթինի մոտ ֆրանսերեն է ուսանել:

1910 թ. մեկնել է Բեյրութ և ընդունվել Սեն Ժոզեֆ Ֆրանսիական համալսարանի բժշկական ֆակուլտետը:

1911 թ. նշանվել է մի հայ օրիորդի հետ:

1914 թ. ամռանն ավարտել է ուսումը և սպասել աշնանը ավարտական քննությունները հանձնելուն:

1915 թ. մայիսին Բեյրութում ձերբակալվել է իբր իր ծննդավայրը ուղարկվելու համար: Սպանվել է նույն տարվա ամռանը՝ Եդեսիայի մոտ կամ Մելիտինեի բանտում, 30 տարեկանում:

Այլ տվյալներով՝ վերապրել է:

Մինասյան Հ., Օսմանյան կայսրությունում, Թուրքիայի Հանրապետությունում և հարակից տարածքներում բռնաճնշումների և ցեղասպանության ենթարկված հայ բժիշկներ: Համառոտ կենսագրական բառարան, Երևան, 2014, 519 էջ, էջ 39–40: