Հունաստանի վարչապետը հրաժարական է տվել

Հունաստանի վարչապետ Ալեքսիս Ցիպրասը հրաժարական է տվել եւ հայտարարել արտահերթ խորհրդարանական ընտրությունների մասին: Այդ հայտարարությունը նա արել է նախարարների եւ իշխող «Սիրիզա» կուսակցության անդամների հետ հանդիպման ժամանակ: Ավելի վաղ հունական լրատվամիջոցները գրում էին, որ Ցիպրասը հրաժարական կտա եւ կմասնակցի արտահերթ խորհրդարանական ընտրություններին: Նույն տվյալներով ընտրությունները կանցկացվեն սեպտեմբերի 20-ին:

Նշենք, որ Հունաստանի խորհրդարանի պատգամավորները բուռն քննարկումներից հետո  հավանության արժանացրին ԵՄ օժանդակության երրորդ փաթեթը, որի արժեքը 86 մլրդ եվրո է: Իսկ Ցիպրասի կուսակցությունը հայտնվեց պառակտման շեմին: Շուրջ 40 պատգամավոր դեմ հանդես եկան այդ փաթեթին, որ ենթադրում է տնտեսական կոշտ քաղաքականություն: Որոշումը կայացվեց ընդդիմության աջակցությամբ:

Այսօր արդեն Հունաստանը միջազգային վարկատուներից ստացել է առաջին վարկը` 13 մլրդ եվրոյի չափով, որով մարել է Եվրոպական կենտրոնական բանկի պարտքը: