Առողջապահության նախարարության մասնագետը խորհուրդ է տալիս պահածոներ չպատրաստել

ԱՆ Առողջապահական պետական տեսչության Հիգիենայի բաժնի պետ Մարգարիտա Բաբայանը խորհուրդ է տալիս զերծ մնալ պահածոներ պատրաստելուց, բանջարեղենը պահպանել սառեցման կամ չորացման եղանակով:

Այսօր լրագրողների հետ հանդիպման ժամանակ Բաբայանն ասաց, որ ինքն անձամբ պահածոներ չի փակում, երբեմն միայն հատապտուղներ է սառեցնում: Խոսելով բոտուլիզմով պայմանավորված սննդային թունավորումների մասին՝ նա նշեց, որ պահածոյի մեջ կարող են լինել սպորներ, որոնք բոտուլիզմ են առաջացնում:

Նրա խոսքով ՝ բոտուլիզմի առաջացման նախանշաններն են սրտխառնոցը, փսխումը, գլխապտույտը, գլխացավը, բերանի չորությունը, ձայնի խռպոտությունը: Բաբայանը փաստեց, որ բարեփախտաբար վերջին երկու տարիներին բոտուլիզմով մահացություններ չեն գրանցվել: Ըստ նրա դա պայմանավորված է նրանով, որ նախանշանների առկայության պայմաններում բնակչությունը հաճախ է սկսել դիմել բժիշկներին:

Նրա խոսքով՝ այս տարի արդեն գրանցվել է բոտուլիզմով թունավորման 12 դեպք՝ 17 տուժածով, մինչդեռ 2014-ին եղել է 9 դեպք: Անդրադառնալով սնկային թունավորումներին՝ առողջապահության նախարարության աշխատակիցն ասաց, որ 2015-ին արդեն գրանցվել է 8 դեպք՝ 10 տուժածով: Նրա խոսքով՝ սնկային թունավորումներով առանձնանում է Լոռու մարզը, և թունավորվողներն էլ հիմնականում երեխաներ են: