Սդղի գյոլի գործով հետախուզման մեջ գտնվողը Սուրիկ Խաչատրյանի եղբոր՝ Հոպոպի որդին է

Երեկ ՀՀ քննչական կոմիտեն տեղեկություն տարածեց, որ  Գորիսի Սդղի գյոլ կոչվող տարածքում Մուշեղ Զաքարյանին միջին ծանրության մարմնական վնաս պատճառելու համար մեղադրանք է առաջադրվել Շահում Դավթյանին: Նրա նկատմամբ,  որպես խափանման միջոց, ընտրվել է չհեռանալու մասին ստորագրությունը: Շ. Դավթյանին մեղադրանք է առաջադրվել ՀՀ քրեական օրենսգրքի 113-րդ հոդվածի 2-րդ մասի 3-րդ կետով:

Նշենք, որ Շահում Դավթյանը հայտնի է Սյունիքում տեղի ունեցած այլ աղմկահարույց միջադեպերով: Նա Սյունիքի մարզպետ Սուրիկ Խաչատրյանի մտերիմներից է և Գորիսում  իրեն քրեական հեղինակության պես է պահում:

 Հիշեցնենք, որ Սդղի Գյոլի գործով վարույթն իրականացնող մարմինը որոշում է կայացրել Մայիս Խաչատրյանին ՀՀ քրեական օրենսգրքի 113-րդ հոդվածի 2-րդ մասի 3-րդ կետով որպես մեղադրյալ ներգրավելու մասին: Երևանի Կենտրոն և Նորք-Մարաշ վարչական շրջանների ընդհանուր իրավասության  դատարանը նրա  նկատմամբ խափանման միջոց է ընտրել կալանավորումը և հունիսի 15-ին նրա նկատմամբ հայտարարվել է հետախուզում:

 Նշենք, որ Մայիս Խաչատրյանը՝ Սուրիկ Խաչատրյանի կրտսեր եղբոր` Հոպոպ մականունով Սերոբ Խաչատրյանի որդին է:

Yerkir.am-ի տեղեկություններով՝ Հոպոպը Սդղի գյոլում գտնվող` Սուրիկ Խաչատրյանին պատկանող ամառանոցային համալիրի «նայողն» է, և դեպքը կատարվել է նրա անմիջական «վերահսկողությամբ»:

Ի դեպ՝ Մայիս Խաչատրյանի անվան հետ էլ են կապված Գուրիսում տեղի ունեցած աղմկահարույց միջադեպեր: Նրա մասնակցությամբ վերջին միջադեպը տեղի է ունեցել 2014-ի հունվարի 22-ին:  Ըստ Գորիսի բաժնում ստացված հաղորդման՝ Յուրա Խաչատրյանն իր բարեկամի` Մայիս Խաչատրյանի հետ գնացել է Գորիս քաղաքի Երևանյան խճուղում գտնվող բենզալցակայան ու ծեծի ենթարկել Վիտալիկ Մեսրոպյանին ու Արթուր Հարությունյանին:

Ավելի վաղ yerkir.am-ը գրել էր, որ Սդղի գյոլում տեղի ունեցած միջադեպին մասնակցել են նաև Սուրիկ Խաչատրյանի մյուս եղբոր՝ Աղալարի որդիները: