Եթե էլեկտրաէներգիայի սակագնի բարձրացումը ճոխամոլության հետևանք է, ուրեմն կա մարդու իրավունքների խախտում. ՄԻՊ

Այսօր լրագրողները ՄԻՊ Կարեն Անդրեասյանին հարցրեցին` դե՞մ է էլեկտրաէներգիայի սակագնի բարձրացմանը: Կարեն Անդրեասյանը պատասխանեց, որ մտահոգված է այդ հարցով, և երկուշաբթի օրը գրություն է ուղարկել ՀԾԿՀ նախագահ Ռոբերտ Նազարյանին՝ ներկայացնելով մի շարք հարցադրումներ:

«Ըստ օրենքի` կա գործընթաց, որ պետք է լինի հանրային քննարկում: Ես պարոն Նազարյանին հարց եմ ուղղել, թե ի՞նչ ֆորմատով է դա լինելու, ո՞ր շահագրգիռ մարմիններն են հրավիրվելու, որ լինի պատշաճ գործընթաց: Եվ միայն պատշաճ գործընթացներից հետո կանդրադառնամ բովանդակային հարցին»,- ասաց ՄԻՊ-ը:

Լրագրողները հարցրեցին` տեսնո՞ւմ է այստեղ մարդու իրավունքների խախտում: Կարեն Անդրեասյանը պատասխանեց. «Ցանկացած դեպքում պետք է ուսումնասիրվի` հայտում ողջամի՞տ են ներկայացրել տվյալները, թե՞ ոչ, գողացվա՞ծ ծախսեր են, թե՞ արդարացված, սպառողների հաշվին ճոխություն վայելող ծախսե՞ր են, թե՞ դրանք այնպիսի հիմնավորումներ են, որ եթե չվճարենք, կմնանք մթության մեջ: Այս բովանդակային հարցերի պատասխանը մենք չէ, որ պետք է տանք»:

Նա նշեց, որ երեկ ծանոթացել է կառավարության աշխատակազմի ղեկավար-նախարար Դավիթ Հարությունյանի դիրքորոշմանը, և եթե հիմնավորվի, որ ինչ-ինչ մարդկանց վատ վարչարարության, ճոխամոլության կամ որևէ այլ ոչ ողջամիտ պատճառներով սակագին է բարձրացվելու, իհարկե, այդտեղ կա մարդու իրավունքների ոտնահարում: