Ես ինձ կեղտոտ կենսագրություն ունեցող մարդկանց թոռ եմ համարում. թուրք մտավորական

Գերմանաբնակ թուրք մտավորական, Համբուրգի երկրամասի պառլամենտի ձախերի խմբակցության ներկայացուցիչ Հասան Բուրգուջուօղլուն Հայոց ցեղասպանության վերաբերյալ շատ կոնկրետ տեսակետ ունի: «Մարդ կոչվելու համար պետք է առերեսվել Ցեղասպանության փաստի հետ»,- այսօր լրագրողների հետ հանդիպման ժամանակ նման կարծիք հայտնեց նա:

Բուրգուջուօղլուն ընդդիմադիր է, նախկին քաղբանտարկյալ, ով լքել է Թուրքիան:

Նա նշեց, որ 1915-ին, իր կարծիքով, հայերին խեղդեցին իրենց բնօրրանում, և կատարվածն այլ կերպ, քան ցեղասպանություն, հնարավոր չէ բնորոշել: «Ամենավատ բանը, որ կարող է մարդը մարդուն անել, դա տեղի ունեցավ Թուրքիայում: Ես, չնայած այն փաստին, որ փախել եմ Թուրքիայից և մշտական բնակություն հաստատել Գերմանիայում, ինձ նույնքան մեղավոր եմ զգում Ցեղասպանության համար. ես ինձ կեղտոտ կենսագրություն ունեցող մարդկանց թոռ եմ համարում»,- ասաց թուրք մտավորականը:

Ըստ նրա` Ցեղասպանությունն անցած փուլ չէ, այն շարունակվում է, քանի որ թուրքերն այժմ ապրում են այն տարածքում, որը հայերի հայրենիքն է եղել:

«Արևմտյան Հայաստանը շատ զարգացած էր մինչև 1915-ը, ներկայիս Թուրքիան անգամ զարգացածության այդ մակարդակին չի հասել: Թուրքիայի կառավարությունը մեկ ելք ունի` ճանաչել Ցեղասպանությունը»,- ասաց Բուրգուջուօղլուն: