Արամ Ա կաթողիկոսը հետևում է Թուրքիայի ՍԴ-ում Սիսի կաթողիկոսարանի վերաբերյալ հարուցված դատին

Ն.Ս.Օ.Տ.Տ. Արամ Ա Վեհափառ հայրապետը հետևում է Թուրքիայի Սահմանադրական դատարանում Սիսի կաթողիկոսարանը վերադարձնելու դատին: Այդ մասին տեղեկացնում է Armenianorthodoxchurch-ը:

Այդ կապակցությամբ Նորին սրբությունը Վաշինգտոնում աշխատանքային հանդիպում է ունեցել դատարանում հայկական կողմի հանձնախմբի անդամներից` թուրք պատմաբան, դոկտոր Թաներ Աքչամի հետ, որը դրական գնահատական է տվել հայցին:

Վեհափառ հայրապետը, ընդգծելով վերջին շաբաթներին տեղի ունեցած զարգացումների հատկանշական երևույթները, կարևորությամբ շեշտել է նույն թափով աշխատանքները շարունակելու անհրաժեշտությունը: Հանդիպման ընթացքում որոշվել է նաև մայիս ամսին կաթողիկոսարանի դատի մասին մամուլի ասուլիս կազմակերպել Պոլսում՝ Թուրքիայում մայիսի 7-ին կայանալիք խորհրդարանական ընտրություններից առաջ:

Կայքը տեղեկացնում է, որ Նորին սրբությունը հետևում է դատի վերաբերյալ միջազգային մամուլի արձագանքներին ու Թուրքիայի կողմից արվող հակազդեցություններին: